Тоҷикистону Эронро бисёр умумиятҳо бо ҳам мепайвандад. Аз лиҳози забон, дин, фарҳанг, адабиёту ҳунар, расму оин пайванди халқҳоямон таърихи қадима доранд.

Дар даврони Истиқлолияти давлатии Ҷумҳурии Тоҷикистон ин робита густариши тоза касб кард, ба сатҳи баланд расид.

Халқи тоҷик ба мардуми Эрон таваҷҷуҳи зиёд дорад. Вале падидаи номатлуб – ба Конфронси 29-уми байналмилалии «Ваҳдати исломӣ» даъват гардида, иштирок ва сухан кардани собиқ роҳбари Ҳизби экстремистӣ ва террористии наҳзати исломи Тоҷикистон Муҳиддин Кабирӣ боиси нигаронии аҳли ҷомеаи мамлакат гардид, ки метавонад муносибати дӯстонаи миёни ин ду кишварро халалдор созад.

Маорифчиёни вилояти Суғд ба ин рӯйдоди нохушоянд ҳамчун ҳодисаи ҷудоиандозанда баҳо дода, онро сахт маҳкум мекунанд. Зеро бо даъвати ин сарваре, ки ба куштору рехтани хуни бегуноҳон борҳо иқдом варзидааст, чӣ гуна ваҳдати мусулмонҳоро таъмин метавон кард? Ин савол ҳар як узви ҷомеаи кишвар, созмонҳои ҷамъиятиро ба изтироб овардааст.

Манфиат ва талаботҳои ҷомеаро аксар вақт нафарони ноогоҳ аниқ дарк намекунанд. Ҳол он ки бародарони эронии мо аз ҳама даҳшату ваҳшати ҷанги бемаънии шаҳрвандӣ дар Тоҷикистон ва бадбахтиҳои ба сари мардум овардаи Кабириву ҳаммаслакони ҳизбиаш дар моҳи сентябри соли 2015 огоҳии комил доштанд. Чӣ гуна метавон шахсеро ба кофронси байналмилалӣ даъват намуд, ки чун ҷинояткор дар кофтукови байналмилалӣ қарор дорад?

Магар муассисони Конфронси байналмилалӣ намедонистанд, ки ба ҳамаи ин ҳодисаҳои хунин Ҳизби экстремистию террористии наҳзати исломи Тоҷикистон роҳбарӣ мекард?

Мо ба ин савол ҷавоб ёфта наметавонем: аз кори конфронсе, ки баробари намояндагони давлатӣ террористону экстремистон низ даъват шудаанд, чӣ натиҷаи мусбатро интизор шудан мумкин аст?

Маорифчиёни вилояти Суғд дар сар чунин саволҳои беҷавоб муассисони Конфронси 29-уми байналмилалии «Ваҳдати исломӣ»-ро, ки имрӯзҳо дар шаҳри Теҳрон идома меёбад, сахт маҳкум намуда, дар андешаи онанд, ки магар чунин кирдорҳои носавоб ба решаҳои дӯстии ду халқи ҳамнаҷод табар намезада бошад?

Осим Каримзода
сардори раёсати маорифи вилоят,
доктори илмҳои таърих, профессор