Навигарӣ

  Омӯзгори фанни забони англисии Литсейи математикии №1-и шаҳри Хуҷанд Дилафрӯз Умарзода  бо гирифтани 205 хол ғолиби озмуни «Омӯзгори соли Тоҷикистон-2019» дониста шуд.
Озмуни мазкур тайи се рӯз идома дошта, дар он панҷ нафар довталабон аз ВМКБ, вилоятҳои Суғд, Хатлон, шаҳрҳои Душанбе ва Ваҳдат аз рӯйи 7 шарт байни ҳам қувваозмоӣ намуданд.
Омӯзгори фанни физикаи Мактаб–интернати ҷумҳуриявии ноҳияи Рӯшон Ризоалӣ Мамадназарбеков соҳиби 177 хол, омӯзгори фанни географияи мактаби Президентии шаҳри Кӯлоб Некрӯз Турсунзода, омӯзгори фанни таърихи Мактаби байналмилалии президентии шаҳри Душанбе Саидкарим Раҳимов соҳиби 193 хол ва омӯзгори фанни ҳуқуқи Литсейи ба номи Т.Собирови шаҳри Ваҳдат Ҳабиба Соҳибова соҳиби 204 хол гардиданд.
Дар маросими ҷамъбастӣ ба ғолиб ва иштирокчиёни озмун туҳфаҳои рамзӣ, маблағ, нишони «Аълочии маориф ва илми Ҷумҳурии Тоҷикистон», дипломи Вазорати маориф ва илм, ифтихорномаи Иттифоқи касабаи кормандони маориф ва илм ва роҳхат ба осоишгоҳу истироҳатгоҳҳо барои истироҳату табобат супорида шуданд.

Ҳамасола бо мароми неки созанда ва ғояҳои наву тоза ба кулли мардуми кишвар ироа гардидани Паёми Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ҳар як шаҳрванди ватандӯсту ватанпарварро болидахотиру ифтихорманд месозад. Болидахотир аз имрӯзи ободу осоишта, мароми неку ниятҳои хайр ва омоли созанда ба хотири беҳдошти зиндагии мардум, осудагии ҷомеа ва ободии кишвари азизамон Тоҷикистон, ифтихорманд аз андешаи миллӣ ва ғояи абадзиндаи башардӯстиву некмаҳзарӣ! (далее…)

   Бо мақсади дарёфти мураббиёни боистеъдод, навовар ва эҷодкор, дастгирӣ ва ҳавасмандгардонии онҳо, ташаккули қобилияти мураббиён ва фаъолияти эҷодӣ дар шароити муосир, такмили донишу маҳорати  касбӣ ва паҳн кардани таҷрибаи пешқадами педагогӣ, қадрдонии меҳнати пурсамари мураббӣ ва баланд бардоштани мақому манзалати мураббиён ҳамасола дар сатҳи ҷумҳуриявӣ озмуни “Мураббии сол” доир мегардад.
Давоми ду рӯз дар толори Донишкадаи ҷумҳуриявии такмили ихтисос ва бозомӯзии кормандони соҳаи маориф даври ҷумҳуриявии озмуни мазкур баргузор гардида, ҳайати ҳакамон бо роҳбарии муовини Вазири маориф ва илми Ҷумҳурии Тоҷикистон Латофат Назирӣ ба дониш ва малакаи иштирокчиён баҳои сазовор доданд.
Розия Нурматова, мураббияи муассисаи томактабии №15-и шаҳри Конибодом аз миёни 5 нафар ғолибони даври минтақавӣ дар иҷрои шартҳои муаррифинома, мизи мудаввар маҳорати баланд нишон дода, ғолиби озмуни “Мураббии соли Тоҷикистон — 2019” гардид.
Ба ғолибони соҳибони мақоми ифтихорӣ дар толори Вазорати маориф ва илми Ҷумҳурии Тоҷикистон ҷоиза ва тӯҳфаҳои хотиравӣ тақдим гардиданд.
Абдусабур Абдуваҳҳобов

   Бо натиҷагирӣ аз фаъолияти солонаи маорифчиёни вилоят субҳи имрӯз дар Коллеҷи техникии шаҳри Хуҷанд бо иштироки муовинони раисони шаҳру навоҳӣ, сардорони раёсат ва мудирони шуъбаҳои маориф, кормандони дастгоҳи Раёсати маориф ва роҳбарони муассисаҳои зертобеи он ҷаласаи ҳайати мушовараи Раёсати маорифи вилоят баргузор гардид.
Ҷаласа бо сухани ифтитоҳии сардори Раёсати маорифи вилоят Осим Каримзода оғоз гардида, мавсуф оид ба натиҷаҳои фаъолияти Раёсати маорифи вилоят дар соли 2019 ва вазифаҳо барои соли 2020 муфассал гузориш дод. Таъкид шуд, ки соли сипаригардида 220 нафар хонандагони болаёқати муассисаҳои таълимии шаҳру ноҳияҳои вилоят ғолиби олимпиадаҳои байналмилалӣ гардиданд, ки аз самараи кори устодон дарак медиҳад. Бо роҳнамоии Пешвои муаззами миллат ва бо дастгирии мақомоти иҷроияи ҳокимияти давлатии вилояти Суғд  дар вилоят баробари роҳандозии азнавсозӣ ва таъмиру тармими бинои 46 муассисаҳои таълимии садамавӣ соли равон  37 иншооти соҳаи маориф бо 4 ҳазору 761 ҷойи нишаст, аз он ҷумла  98 синфхонаҳои иловагӣ дар назди муассисаҳои таълимӣ бо 2 ҳазору 826 ҷойи нишаст дар шаҳру навоҳии вилоят ба истифода дода шуданд. Баробари ин, аз 228 муассисаҳои таъмирталаб то ҳол 115 муассисаҳои таълимӣ аз таъмири куллӣ бароварда шуда, дар 60 муассиса корҳои таъмирӣ давом доранд.
Дар идомаи кори ҷаласа аъзоёни Шӯрои машваратӣ нақшаи кории Раёсати маорифи вилоят барои нимсолаи аввали соли 2020- ро тасдиқ намуданд.
Дар бораи  пешниҳодҳои Прокуратураи вилояти “Оид ба бартараф намудани қонунвайронкуниҳо ва сабабу шароитҳои ба он мусоидаткунанда, вобаста ба ҳолати иҷрои қонунгузорӣ дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2019-2020, “Оид ба бартараф намудани қонунвайронкуниҳо ва сабабу шароитҳои ба он мусоидаткарда дар фаъолияти муассисаҳои таълимии шаҳру ноҳияҳои вилоят оид ба ҳолати иҷрои Қонуни Ҷумҳурии Тоҷикистон “Дар бораи мубориза бар зидди коррупсия”,  натиҷаҳои рӯзҳои Раёсати маорифи вилоят, санҷиши сатҳу сифати таҳсилот ва рафти иҷрои қарори Ҳукумати Ҷумҳурии Тоҷикистон «Дар бораи тасдиқи қоидаҳои аз аттестатсия гузаронидани кормандони шуъбаҳои маориф, муассисаҳои таҳсилоти умумӣ, томактабӣ ва таҳсилоти иловагии Ҷумҳурии Тоҷикистон» дар шаҳри Истиқлол сармутахассиси шуъбаи муассисаҳои томактабӣ ва миёнаи умумӣ Бахтиёр Сарҳадов ва мудири шуъбаи омор, ояндабинӣ ва банақшагирии Раёсат Раҳмаҷон Зокиров гузориш доданд. Натиҷаҳои аттестатсияи гимназияи №6-и ноҳияи Ашт, аккредитатсияи давлатии гимназияи №1-и ноҳияи Деваштич дар баромади сардори шуъбаи  Хадамоти назорат дар соҳаи маориф дар вилоят  Абдураҳим Қурбонов мавриди таҳлил қарор ёфтанд.
Аз ҷараёни санҷиши вазъи таълиму тарбия дар муассисаҳои таҳсилоти томактабии шаҳри Бӯстон ва ноҳияи Б.Ғафуров, рафти иҷрои қарори Ҳукумати Ҷумҳурии Тоҷикистон аз 29.11.2017, №544 «Барномаи давлатии таъмини муассисаҳои таҳсилоти умумии ҷумҳурӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2018-2020» дар муассисаҳои таълимии шаҳру ноҳияҳои вилоят, рафти иҷрои қарори Ҳукумати Ҷумҳурии Тоҷикистон аз 29 сентябри соли 2017, №443 “Дар бораи Барномаи давлатии амалӣ намудани технологияҳои иттилоотӣ-коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2018-2020” дар муассисаҳои таълимии вилоят мутахассиси пешбари шуъбаи муассисаҳои томактабӣ ва миёнаи умумӣ  Гулсарахон Тошматова ва  сармутахассиси шуъба Дилрабо  Сатторова  маълумот доданд.
Доир ба рафти иҷрои қарори Ҳукумати Ҷумҳурии Тоҷикистон аз 29 сентябри соли 2017, №443 “Дар бораи Барномаи давлатии амалӣ намудани технологияҳои иттилоотӣ-коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2018-2020” дар муассисаҳои таълимии вилоят директори маркази технологии иттилоотӣ — коммуникатсионӣ Юсуфҷон Домуллоҷонов гузориш дод.
Осим Каримзода  дар ҷамъбасти ҷаласаи ҳайати мушовара ҷиҳати баргардонидани кӯдакистонҳои тобеи ташкилоту корхонаҳо  тибқи талаботи Барномаи давлатии  рушди соҳаи томактабӣ, истифодаи мақсадноки маблағҳои буҷавӣ ва ғайрибуҷавӣ,  пешгирӣ ва бартараф сохтани ҳолатҳои коррупсионӣ, таъмини иҷрои ҳамаҷиҳатаи қарори Ҳукумати Ҷумҳурии Тоҷикистон дар бораи “Барномаи давлатии таъмини муассисаҳои таҳсилоти умумии ҷумҳурӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2018-2020”, таъмиру тармими биноҳои садамавӣ, бунёди мактабу синфхонаҳои иловагӣ бо ҷалби соҳибкорон, кумитаи падару модарон, саховатмандон ва сармоягузорон, фаъолияти босамари маҳфилҳои омӯзишӣ, беҳтар намудани вазъи лагерҳои беруназмактабӣ, ташкили Марказҳои инкишофи кудак барои омодагӣ ба мактаб, омодагии иншоотҳои ҷашнӣ дастуру супоришҳо дод.
Бо қабули қарорҳои дахлдор чорабинӣ хотима пазируфт.

   Дар шаҳри Алмаатои Ҷумҳурии Қазоқистон даври ниҳоии Олимпиадаи Х1 Авруосиёгӣ ва Олимпидаи кушоди умумирусиягии даставӣ аз фанни технологияи иттилоотӣ баргузор гардид. Шарафи кишвари моро 7 даста  (як даста аз вилояти Суғд ва 6 даста аз шаҳри Душанбе) — ғолибони даври аввали озмун тариқи фосилавӣ ҳимоя намуданд.
Боиси ифтихор аст, ки аъзои дастаи вилояти Суғд, се нафар хонандагони Литсейи физикӣ — математикии рақами 1 — и шаҳри Хуҷанд — Раҳимҷон Ҳакимов, Абдурафиқи Абдушариф ва Муҳаммадаюб Умаров таҳти роҳбарии омӯзгори литсей Ҳусейнҷон Ачилов аз фанни технологияи иттилоотӣ дар  Олимпиадаи Х1 Авруосиёгӣ сазовори ҷойи якум ва дар Олимпиадаи кушоди умумирусиягӣ сазовори мақоми сеюм гардиданд.  Ғолибият дар ин озмуни бонуфузи байналмилалӣ имкон дод, ки ҳар се ғолибон минбаъд таҳсили худро дар Донишгоҳи техникии Қазоқистону  Британияи шаҳри Алмаато ва дар Донишгоҳи Остонаи Ҷумҳурии Қазоқистон идома диҳанд.
Дар озмуни даставии Олимпиадаи кушоди умумирусиягӣ бошад, дастаи Литсейи физикӣ — математикӣ сазовори ҷой 3-юм гардид, ки беҳтарин дастовард миёни 256 даста аз давлатҳои Иттиҳоди давлатҳои муштаркулманофеъ мебошад.

Абдусабур Абдуваҳҳобов

    Дар ҷаласаи навбатии ҳайати  мушовараи Раёсати маорифи вилоят, ки дирӯз бо иштироки сардорони раёсат, мудирони шуъбаҳои маорифи шаҳру ноҳияҳои вилоят, роҳбарони воҳидҳои сохторӣ ва кормандони масъули дастгоҳи раёсат баргузор гардид, як қатор маъалаҳои муҳим ва мубрами соҳа мавриди баррасӣ қарор гирифтанд.
Ҳозирин аввал пешниҳодҳои Прокуратураи вилояти Суғд аз 15.11.2019, №8/356-19 “Оид ба бартараф намудани қонунвайронкуниҳо ва сабабу шароитҳои ба онҳо мусоидаткунанда вобаста ба ҳолати иҷрои қонунгузорӣ дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2019-2020”, аз 19.11.2019, №14/43сод-19 “Оид ба бартараф намудани қонунвайронкуниҳо ва сабабу шароитҳои ба онҳо мусоидаткарда”-ро муҳокима намуда, ҷиҳати ислоҳи эродҳои баёншуда масъулинро вазифадор намуданд. (далее…)

   Дар толори маҷлисгоҳи мактаб барои хонандагони болаёқати шаҳри Хуҷанд даври вилоятии озмунҳои “Мураббиии соли Тоҷикистон” ва “Омӯзгори соли Тоҷикистон” баргузор гардид.
Дар расми ифтитоҳи чорабинии мазкур муовини Раиси вилоят Оқилзода Зайнура Азимӣ ва муовини сардори Раёсати муассисаҳои томактабӣ ва миёнаи умумии Вазорати маориф  ва илми Ҷумҳурии Тоҷикистон Зиёратшоҳ Нарзуллозода суханронӣ намуда, таъкид доштанд, ки озмунҳои вилоятии “Омӯзгори соли Тоҷикистон”, “Мураббии соли Тоҷикистон” аз зумраи тадбирҳои хеле муфид маҳсуб мешаванд, ки  ба дарёфти  омӯзгорону мураббиёни боистеъдод, навовару эҷодкор мусоидат карда,  дар қадрдонии заҳмат, баланд бардоштани мақому манзалати ходимони соҳаи маориф дар ҷомеа, тарғиб ва паҳн намудани таҷрибаи пешқадам саҳми назаррас дорад. Таъкид шуд, ки шурӯъ аз соли 2020 озмунҳои мазкур мувофиқи фанҳои ихтисосӣ доир шуда, 13 нафар омӯзгорони болаёқат — ғолибони фании ҷумҳуриявӣ интихоб мешаванд.
Сипас  5 нафар ғолибони давраи якуми озмуни “Мурабии соли Тоҷикистон” аз шаҳру навоҳии Хуҷанд,  Конибодом, Исфара, Бобоҷон Ғафуров ва кӯдакистони Президентӣ,  3 нафар ғолибони даври аввали озмуни “ Омӯзгори соли Тоҷикистон”  аз шаҳру навоҳии Хуҷанд, Истиқлол, Деваштич  аз рӯи шарти муаррифии таҷрибаи корӣ  вориди сабқат гардиданд. Тибқи баҳогузории ҳакамон Розия Нурматова, мураббияи муассисаи таҳсилоти томактабии №15-и шаҳри Конибодом ба даври ҷумҳуриявии озмуни мазкур роҳхат гирифта, дар озмуни “Омӯзгори соли Тоҷикистон” роҳхат насиби Дилафрӯз Каримова, омӯзгори фанни забони англисии Литсейи математикӣ- физикии №1 -и шаҳри Хуҷанд ба номи академик Муҳаммад Осимӣ гардид.
Ёдовар мешавем, ки дар даври аввали озмунҳои мазкур 17 нафар ғолибони сатҳи шаҳриву навоҳӣ  аз рӯи 5 шарт нерӯсанҷӣ намуда буданд.

   Дар толори маҷлисгоҳи Раёсати маорифи вилоят бо иштироки муовини сардори Раёсати кадрҳо ва корҳои махсуси Вазорати маориф ва илми Ҷумҳурии Тоҷикистон Дилафрӯз Назаралиева, мутахассиси пешбари раёсати мазкур Дилбар Алихонзода, мудирону масъулини  шуъбаҳои кадрҳо ва корҳои махсуси раёсат ва шуъбаҳои маорифи шаҳру ноҳияҳои вилоят семинари дастурдиҳӣ ва омӯзишӣ доир гардид.
Семинарро муовини сардори Раёсати маорифи вилоят Сайфулло Раҳматов оғоз бахшида, баён дошт, ки тадбири мазкур барои ислоҳи камбудиҳои мавҷудаи соҳа дар самти низоми ҳуҷатгузорӣ мусоидат хоҳад кард.
Дилбар Алихонзода оид ба масъалаи ба ҷойи кор ҳозиршавии мутахассисони ҷавон, имтиёз ва роҳҳои  ҳавасмандкунии онҳо, Дилафрӯз Назаралиева дар бораи тарзи дуруст пур кардани шаҳодатномаҳои хатми синфи 9 ва 11, Набиҷон Раҳмонов, мудири шуъбаи кадрҳо ва корҳои махсуси Раёсати маорифи вилоят оид ба тарзи дуруст таҳия кардани ҳуҷҷатҳо барои мукофотҳои давлатӣ ва тариқи гузаронидани озмуни квотаи Президентӣ барои дохил шудан ба муассисаҳои олии касбии Ҷумҳурии Тоҷикистон,  Сафияхон Каримова Шӯҳрат Азизов, мутахассисони пешбари шуъбаи кадрҳо ва корҳои махсуси Раёсати маорифи вилоят дар бораи эҳтиёҷ ба кадрҳои омӯзгорӣ ва низоми фаъолияти онҳо, доир аз аттестатсияи навбатӣ гузаронидани омӯзгорон суханронӣ намуданд.
Дар ҷараёни семинар маърузачиён ба саволҳои иштирокдорон посухҳои мушаххас доданд. Бо қабули қарорҳои оид ба масъалаҳои зикршуда семинар анҷом ёфт.

Абдусабур Абдуваҳҳобов, “Маорифи Суғд”

   Бо иқдоми филиали Муассисаи давлатии “Донишкадаи ҷумҳуриявии такмили ихтисос ва бозомӯзии кормандони соҳаи маориф” дар вилояти Суғд дар толори Гиманазияи №2, ноҳияи Б.Ғафуров бахшида ба Рӯзи Президенти Ҷумҳурии Тоҷикистон  конференсияи илмӣ дар мавзӯи «Нақши Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар таҳкими давлатдории миллӣ» доир гардид.
Ҳамоишро директори филиали Донишкада М. Исматдинов ҳусни оғоз бахшида, роҷеъ ба нақш ва мақоми Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар тақвияти асосҳои сохтори конститутсионии Ҷумҳурии Тоҷикистон, Истиқлолияти давлатӣ ва тамомияти арзӣ, якпорчагии Ватан, пойдории давлат, таҳкими демократия, таъмини рушди иқтисодӣ, иҷтимоӣ ва фарҳангӣ, ҳифзи арзишҳои таърихии давлатдории миллӣ ҳарф зад.
Баъдан дар мавзӯи «Нақши Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар  таҳия ва татбиқи ҳадафҳои стратегии давлат», омӯзгори калони ФДҶТИБКСМ дар вилояти Суғд Ҳ.Дадобоев «Саҳми Пешвои миллат дар густариши муносибатҳои байналмилалии Ҷумҳурии Тоҷикистон» мудири кафедраи муносибатҳои байналмилалӣ (дипломатияи) ДДҲБСТ дотсент, Б.Алимов, таҳти унвони “Ташаббусҳои созандагии Пешвои миллат дар рушди маорифи миллӣ», муовини директор оид ба илм ва инноватсияи филиал досент Ш., Рустамов дар мавзӯи «Пешвои миллат — муаррифгари Тоҷикистони соҳибистиқлол», омӯзгори фанни таърих ва ҳуқуқи МТМУ №11, ноҳияи Б.Ғафуров Б.Қаҳҳорова маърӯзаҳои илмӣ намуданд.
Бахшида ба ин мавзӯъ дар толор  намоиши китобу асарҳои Пешои муаззами миллат, ҳамчунин китобу маҷмӯаҳои марбут ба самтҳои мухталифи фаъолияти серҷабҳаи Пешвои миллат, намунаҳои мақолаҳои манташир дар рӯзномаву маҷаллаҳо ва ғайраҳо ба маърази тамошо гузошта шуданд.
Боиси зикр аст, ки чорабинӣ дар якҷоягӣ бо омӯзгорону таълимгирандагони Гимназияи №2-и ноҳияи Б.Ғафуров ташкил ва баргузор гардида, аз ду қисмат – қисмати конференсияи илмӣ ва бахши адабӣ фарҳангӣ иборат буд. Дар бахши фарҳангии чорабинӣ савту навои ҷолиб, композитсияи адабӣ бахшида ба Пешвои миллат ва баргузории Иҷлосияи таърихии XVI Шӯрои Олии Ҷумҳурии Тоҷикистон аз ҷониби таълимгирандагон ва аъзоёни маҳфилҳои гимназияи зикршуда ба чорабинӣ  шукӯҳи хоса зам намуд.

Шавкат Рустамов, муовини директор оид ба корҳои
илм ва инноватсия, дотсент