Навигарӣ

     Бо иштироки кормандони Раёсати маорифи вилоят, сардорони Раёсат, мудирони шуъбаҳои маорифи шаҳру ноҳияҳо, директорони Марказҳои дарёфт ва рушди истеъдодҳо, роҳбарони Марказҳои таҳсилоти иловагӣ, роҳбарони як қатор муассисаҳои таълимӣ семинари машваратӣ – дастурдиҳии вилоятӣ доир гардид.

       Сардори Раёсати маорифи вилояти Суғд Каримзода Осим Қосимӣ дар мавзӯи “Пешрафти маорифи миллӣ – ояндаи неки кишвар, саҳми аҳли маориф дар тарбияи ҳисси ватандӯстӣ ва пешгирии бегонапарастии хонандагон”  маърӯза намуда, ҳозиринро бо вазифаҳое, ки аз Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бармеоянд, шинос намуд.  Мавсуф оид ба саҳми аҳли маориф дар тарбияи ҳисси ватандӯстӣ ва пешгирии бегонапарастии хонандагон, ҷиноятсодиркуниву қонунвайронкунӣ батафсил истода гузашт.  Аз ҷумла номбурда таъкид кард, ки Паёми навбатии Сарвари давлат ҳама паҳлуҳои ҳаёти ҷомеаи имрӯзаро фаро гирифта, масъулияти ҳар яки моро ҷиҳати устувор намудани пояҳои давлату давлатдории миллӣ ва ободу зебо гардонидани сарзамини аҷдодӣ боло мебардорад. Паём ҳар фарди бонангу номусро вазифадор месозад, ки ба хотири таҳкими ваҳдати миллӣ, Истиқлолияти давлатӣ, густариши худшиносиву худогоҳӣ ва ифтихори ватандорӣ кӯшишу талоши пайваста дошта бошад. Пешвои миллат дар Паёмашон диққати ҳозиринро ба куллан тағйир додани сатҳу сифати донишомӯзӣ дар муассисаҳои таълимӣ ҷалб карда, хеле бамаврид таъкид карданд, ки агар мо ба рушди илму маориф эътибори ҷиддӣ надиҳем, сатҳи дониши мутахассисонамонро ба талаботҳои байналмилалӣ ҷавобгӯ нагардонем, ба ягон хел натиҷаҳои ниҳоии хуб ноил шуда наметавонем.

        Перомуни саҳмгирии маорифчиён дар мавриди роҳ надодан ба таълимоти ғайрирасмии динӣ ва дар замина баланд бардоштани маърифати сиёсӣ, пешгирии ба муҳоҷират рӯ овардани тарбиятгарони насли ояндасоз, аз таълим берун мондани хонандагон, ҷилавгирии хонандагон аз шомилшавӣ ба ҳизбу ҳаракатҳои иртиҷоӣ, сабаб ва омилҳои ба вуҷуд омадани оилаҳои ноустувор, душвортарбия будани ноболиғон, тақлид ба фарҳанги бегонапарастӣ, роҳ надодан ба ҷиноятсодиркунии хонандагон ва ба худкушию сӯиқасд ба ҷони худ ибрози ақида намуда, бо мисолҳои мушаххас вазъи ба амал омадаро бозгӯ намуд. Аз ҷумла зикр шуд, ки яке аз мушкилоти асосии ҷомеаи муосир, ки тамоми ҷаҳониёнро ба ташвиш овардааст, зуҳуроти номатлуби терроризм ва экстремизм мебошад. Яке аз омилҳои асосии омодашавӣ ва гумроҳшавии ҷавонон, ки ниҳоят ба ҳодисаву воқеаҳои экстремистиву террористӣ ва шомилшавӣ ба ҳизбу ҳаракатҳои иртиҷоӣ оварда мерасонад, ин тадриси динии насли наврас ва  ҷавонони ноогоҳ  дар назди «муллоҳои  худомўз» ба ҳисоб меравад. Таъкид карда шуд, ки дар шароити кунунӣ мо бо ҷалби аҳли ҷомеа, бахусус падару модар бояд наслеро тарбия карда, ба воя расонем, ки аз нигоҳи одобу ахлоқ, донишу заковат, худшиносиву ҷаҳонбинӣ ба талаботи ҷаҳони муосир мувофиқ бошанд. Мавсуф дар идомаи суханронии худ яке аз омили аз тарбия дур мондани хонандагонро  дар муҳоҷирати меҳнатӣ қарор доштани волидон рабт дошта, зикр намуд, ки яке аз масъалаҳои муҳиме, ки имрӯз аҳли ҷомеа бо он рӯ ба рӯ шудааст, ин туфайли  муҳоҷирати меҳнатӣ ба амал омадани оилаи ноустувор, хонандагони душвортарбия ва аз таълиму дур мондани наврасону ҷавонон аст. Қайд шуд, ки ҳарчанд 84 нафар хонандагони душвортарбия ба маҳфилҳои ҳунаромӯзии Марказҳои таҳсилоти иловагӣ ҷалб  шудаанд, ин тадбир дар мавриди пешгирии ҷиноятсодиркунии наврасону ҷавонон кифояткунанда нест.

        Вобаста ба масъалаи муҳокимашуда дар назди ҳозирин вазифаҳои мушаххас гузошта шуд.

     Дар Плнетарияи ба номи Абумаҳмуди Хуҷандӣ ба муносибати эълон гардидани солҳои 2020 — 2040  “Бистсолаи омӯзиш ва рушди илмҳои табиатшиносӣ, дақиқ ва риёзӣ дар соҳаи илму маориф” озмуни вилоятии “Мошинаҳои ояндаи коинот”  баргузор гардид.
Ҷонишини сардори Раёсати маорифи вилоят Сайфулло Раҳматов дар маросими оғози чорабинӣ қайд намуд, ки озмуни вилоятии  “Мошинаҳои ояндаи коинот” дар давраи басо муҳим гузашта истодааст. Зеро бе аз худ намудани техника ва технологияҳои пешқадам тараққиёти ҷомеаи ҷаҳониро тасаввур кардан душвор аст. Ташкилу баргузории озмуни имрӯза ба сайқали донишу малакаи насли наврас вобаста ба аз худ намудани техникаву технологияҳои ҳозиразамон ва дар оянда фахри халқу миллати сарбаланди мо мегарданд, мусоидат хоҳад кард. (далее…)

       Ҷиҳати таъмини иҷрои Амри Президенти Ҷумҳурии Тоҷикистон аз 11 феврали соли 2021, № АП-44 дар бораи  ташкил ва гузаронидани озмуни ҷумҳуриявии “Илм – фурӯғи маърифат” таи чор рӯз  дар  шаҳри Душанбе даври ниҳоии озмун баргузор гардид.
Дар давраи ниҳоии ин озмуни бонуфуз вилояти Суғдро 74 нафар, аз ҷумла 37 нафар хонандагони муассисаҳои таълимӣ ва 37 нафар донишҷӯёну омӯзгорон ва намояндагони касбу кори гуногун намояндагӣ намуданд.
Намояндагони вилоят дар аксар бахшҳо ҳунару маҳорат, истеъдоди воло намоиш дода, ба дарёфтҳои ҷойҳои ифтихорӣ мушарраф гардиданд.
Аз ҷумла, дар бахшҳои биология, география, химия, физика, ихтироъкорӣ ва навоварӣ хонандаи синфи даҳуми Литсейи № 1-и шаҳри Исфара М. Ҷӯраев, хонандаи синфи даҳуми мактаб барои хонандагони болаёқати ноҳияи Бобоҷон Ғафуров О. Рӯзиев, хонандаи синфи ёздаҳуми мактаби Президентии шаҳри Бӯстон С. Машарифов, хонандаи синфи даҳуми Литсейи Донишкадаи политехникии Донишгоҳи техникии Тоҷикистон ба номи М.Осимӣ А. Бойматов хонандаи синфи даҳуми мактаби хусусии “Гулчини маърифат”-и шаҳри Хуҷанд И. Темирхоҷаев туфайли донишу маҳорати баланд  ба дарёфти ҷойҳои ифтихорӣ мушарраф гардиданд.
Ҳамчунин, дар озмун донишҷӯён, омӯзгорони муассисаҳои таҳсилоти миёна ва олии касбии вилоят, намояндагони касбу кори гуногун аз рӯи бахшҳо ғолибият ба даст оварданд.
 Соҳибони се ҷои аввали озмун бо Ифтихорномаи Президенти Ҷумҳурии Тоҷикистон, Ҷом ва мутаносибан бо маблағи 35, 25, 15 ҳазор сомонӣ мукофотпулӣ  сарфароз гардонида шуданд.
Шоистаи қайд аст, ки иштирокчиёни фаъоли озмун бо Ифтихорномаи Президенти Академияи миллии илмҳои Тоҷикистон ва 8 нафар  ҳар кадом ба маблағи 3 ҳазор сомонӣ мукофотпулӣ қадрдонӣ шуданд.
Тазаккур бояд дод, ки озмуни мазкур бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имсол бори аввал роҳандозӣ гардида, баргузории он солҳои минбаъд анъанавӣ хоҳад гардид.

Д. САТТОРОВА,

сармутахассиси Раёсати
маорифи вилояти Суғд

          Тоҷикистони азизи мо ҳамчун  давлати соҳибистиқлол соҳиби рамзҳои давлатии худ аст, ки парчам яке аз онҳо  мебошад. Халқи тоҷик  аз он халқҳои куҳантаърихи ҷаҳонаст,   ки дар тўли таърих соҳиби давлату  парчами хеш буданд.Таърихи  парчамдории тоҷикон хеле рангин аст. “Дирафши ковиёнӣ” ва ё “ Ахтари ковиёнӣ” давоми ҳазорсолаҳо чун рамзу асолати  миллию давлатдорӣ,  муттаҳидӣ ва мубориза  шинохта шудааст.
Санаи 24 –уми ноябри соли 1992  Иҷлосияи 16 Шўрои Олии Ҷумҳурии Тоҷикистон “Дар бораи тасдиқи  Низомномаи  Парчами  давлатии Ҷумҳурии Тоҷикистон”- ро  қабул кард. Дар натиҷа  Тоҷикистони соҳибистиқлолу шарафманд соҳиби  парчами миллии худ гардид.
                                                                 Парчами Тоҷикистони ман,
                                                                 Партави шаъни ман, шони ман.
                                                                 Ҳар нахи тору пуди ту шуд
                                                                 Ришта аз риштаи  ҷони ман.
Парчам на танҳо рамзи давлатдорию ифтихори ватандорӣ, балки рамзи ватандўстию худогоҳию худшиносӣ, пирўзиву  сарфарозӣ ва ҳувияти  милли мардуми тамаддунофарамон маҳсуб меёбад.   Мардуми шарафманди  Ватани мо – Тоҷикистони азиз таҳтиПарчами миллӣ обрўю эътибори  мамлакатамонро дар арсаи ҷаҳонӣ баланд мебардоранд.
Мо — омўзгорон вазифарем, ки оид ба   дар бораи фидокориҳои  Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ба даст овардани сулҳу ваҳдати миллӣ, бунёдкорию созандагӣ ва рамзҳои давлатӣ дар дарсҳо пайваста ба хонандагон маълумот диҳем. Шогирдонро онҳоро тавре тарбия намоем, ки ба қадри ин Ватану миллат ва муқаддасоти он, аз ҷумла Парчами  давлатӣ расанд. Зеро қадршиносӣ аз Парчами давлатӣ  ва дигар рамзҳои давлатӣ арҷгузорӣ ва ифтихор аз давлат, аз гузаштаю имрўзи халқу миллат аст..
                                                                                                                                                                  Гулрў ФАЁЗОВА,
                                                                                                                                                                  омўзгори  гимназияи  №2,
                                                                                    шаҳри Бўстон

     Маорифчиёни вилоят дар мақоми саодат ва шукргузорӣ аз таваҷҷуҳу ғамхориҳои ҳамешагии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Мақомоти иҷроияи ҳокимияти давлатии вилоят ба соҳаи маориф барои афзун намудани дастовардҳояшон талош меварзанд.
Аз 31 – уми октябр то 7 – уми ноябри соли 2021 дар шаҳри Анталияи кишвари Туркия 13 – умин Олимпиадаи байналмилалии «Дониш дар Анталия» аз фанҳои математика, забони англисӣ, география, биология, таърихи ҷаҳон, физика, химия, ҳифзи муҳити атроф, рассомӣ ва сайёҳӣ баргузор гардид. Дар ин чорабинӣ 34 нафар толибилмони муассисаҳои таълимии вилоят аз шаҳру ноҳияҳои Исфара, Бӯстон, Хуҷанд, Бобоҷон Ғафуров, Спитамен ва                                                                                                                                                                                                                                                           Мактаби  Президентӣ воқеъ дар шаҳри Бӯстон ширкат варзиданд.
Боиси ифтихор аст, ки мактабиёни вилоят дар ин озмуни донишу ҳунар  бомуваффақият иштирок намуда, ба дастоварди назаррас сазовор гардиданд. Аз ҷумла, 29 нафар хонандагон  ғолибият ба даст оварда, ба гирифтани  ҷойҳои ифтихорӣ ноил шуданд. 10 нафар,  сазовори ҷойи якум, 10 нафари дигар  сазовори ҷойи  дуюм ва 9 нафар ба дарёфти ҷойи сеюм мушарраф шуданд. Инчунин, дастаҳои толибилмон аз фанҳои физика,  химия ва биология ғолиб дониста, бо 3 адад Ҷоми даставӣ сарфароз гардонида шуданд.