Дар шаҳри Истиқлол бунёду муҷаҳҳазсозии кўдакистони «Дўстӣ» ҷараён дорад, ки бо мавриди истифтиода қарор гирифтани он 240 нафар ба таълиму тарбия фаро гирифта мешаванд.
Бинобар иттилои Хадамоти матбуоти Раиси вилояти Суғд кўдакистони мазкур бо саҳмгузории «Ширкати саноати куҳии Тоҷикистону Хитой» сохта шуда, он дорои шароити муосир хоҳад гашт. Ширкати мазкур яке аз калонтарин корхонаҳои муштараки кишвар буда, саҳми он дар ташаккули маҷмуи маҳсулоти саноатӣ назаррас аст. Дар доираи созишномаҳои дуҷониба ширкат уҳдадор гардидааст, ки дар корҳои ободониву созандагӣ ва рушди маҳал саҳм гузошта, иншооти иҷтимоӣ бунёд созад. Бо дастгирии ширкат айни замон бунёди кўдакистони «Дўстӣ» ҷараён дошта, интизор меравад, ки он ояндаи наздик ба истифода дода шавад.
Зимни боздид Раиси вилоят Раҷаббой Аҳмадзода аз ҷараёни сохтмони кўдакистон барои ташкили системаи ягонаи гармидиҳӣ ва дигар иншооти ёрирасон ба масъулин супоришҳо дод.
Ёдовар бояд шуд, ки дар ҳудуди шаҳр 6 муассисаи таҳсилоти миёнаи умумӣ, 2 муассисаи томактабӣ, 1 маркази таҳсилоти иловагӣ ва 1 литсейи касбии техникӣ фаъолият дошта, дар муассисаҳои таҳсилоти миёнаи умумӣ 2558 нафар хонандагон таълим мегиранд.
Навигарӣ
Озмуни ҷумҳуриявии маданияти андозсупорӣ-баҳои бофарҳангии ҷомеа
Дар Китобхонаи миллии Тоҷикистон маросими ҷоизасупорӣ ба ғолибони озмуни ҷумҳуриявии “Маданияти андозсупорӣ – баҳои бофарҳангии ҷомеа” баргузор шуд. Озмун бо ташаббуси Кумитаи андози назди Ҳукумати Ҷумҳурии Тоҷикистон, ҷиҳати истиқболи сазовори 30-солагии Истиқлоли давлатии Ҷумҳурии Тоҷикистон, инчунин бо мақсади ташвиқу тарғиби муқаррароти қонунгузории андоз ва дигар санадҳои меъёрии ҳуқуқӣ, инчунин ҳавасманд намудан, баланд бардоштани фарҳанги насли наврас, донишҷўён, шаҳрвандон ва соҳибкорон дар ин масир доир гардид. Озмун аз рўи 2 номинатсия: расми беҳтарин – таҳти унвони «Андоз аз нигоҳи наврасон» барои хонандагони муассисаҳои таҳсилоти миёнаи умумӣ ва «Беҳтарин донандаи Кодекси андози Ҷумҳурии Тоҷикистон» – барои донишҷўёни таҳсилоти ибтидоӣ, миёна ва олии касбӣ, шаҳрвандон ва соҳибкорон баргузор шуд.
Озмуни мазкур дар ҳамкорӣ бо вазорат, кумитаву идораҳои дахлдор, мақомоти иҷроияи маҳаллии ҳокимияти давлатӣ дар вилоятҳо ва шаҳру ноҳияҳо баргузор гардид. Дар он хонандагони муассисаҳои таҳсилоти миёнаи умумӣ, донишҷўёни таҳсилоти ибтидоӣ, миёна ва олии касбӣ, шаҳрвандон ва соҳибкорон иштирок доштанд.
Тибқи Низомнома, озмун дар се давр гузаронида шуд. Даври якум дар шаҳру ноҳияҳои вилояти Суғд то 15 июни соли 2021 доир шуд. Дар он хонандагоне иштирок карданд, ки дар мавзўъҳои моҳияти андоз ва андозсупорӣ, зарурати пардохти андозҳо ба буҷет, аҳамияти он дар ҳаёт ва рушди ҷомеа, иқтисодиёти мамлакат тасвирҳо ва ангораҳо (макетҳо) пешниҳод намуданд.
Даври дуюми озмун санаи 10 августи соли 2021 дар бинои Раёсати андоз дар вилояти Суғд бо иштироки муовини Раиси вилояти Суғд Анвар Яъқубӣ ва намояндагони мақомоти дахлдор ва санаҳои 18 — 19 октябри соли 2021 дар Кумитаи андози назди Ҳукумати Ҷумҳурии Тоҷикистон даври сеюм (ҷамъбастӣ) баргузор гардиданд.
Аз рӯи номинатсияи «Андоз аз нигоҳи наврасон» Азиза Эргашева — хонандаи синфи 10-и Гимназияи №1, шаҳри Бӯстон ҷойи якум, Парвина Толибова — хонандаи синфи 7-и Гимназияи №4, шаҳри Истаравшан ҷойи дуюм, Мижгона Муханова — хонандаи синфи 10-и Гимназияи №1, шаҳри Бустон сазовори ҷойи сеюм гардиданд. Ҳамчунин Матин Қаҳҳоров – хонандаи синфи 6-и Гимназияи “Гёте”, шаҳри Хуҷанд, Адҳам Абдунабиев – хонандаи синфи 11, МТМУ №28-и ноҳияи Спитамен, Абӯбакр Қӯзиев – хонандаи синфи 9, МТМУ №15-и ноҳияи Бобоҷон Ғафуров иштирокчиёни фаъол дониста шуданд.
Аз рӯи номинатсияи «Беҳтарин донандаи Кодекси андози Ҷумҳурии Тоҷикистон» Фарҳодҷон Ҷумъаев — донишҷӯи Донишгоҳи давлатии ҳуқуқ, бизнес ва сиёсати Тоҷикистон соҳиби ҷойи якум, Дилноза Қосимзода — донишҷӯи Донишкадаи политехникии Донишгоҳи техникии Тоҷикистон ҷойи дуюм ва Назир Зокиров — соҳибкори инфиродӣ аз ноҳияи Бобоҷон Ғафуров сазовори ҷойи сеюм гардиданд. Ҳамзамон, Комрон Ҷабборов – донишҷӯи Донишгоҳи иқтисод ва савдои ДДТТ дар шаҳри Хуҷанд иштирокчии фаъол дониста шуд.
Озмуни ҷумҳуриявии “Маданияти андозсупорӣ – баҳои бофарҳангии ҷомеа” барои амиқтар ва фарохтар гардидани сатҳи дониши хонандагон, донишҷўён, шаҳрвандон ва соҳибкорон ҳамаҷиҳата мусоидат намуд. Иштироки фаъолонаи хонандагони муассисаҳои таҳсилоти миёнаи умумӣ, донишҷўёни коллеҷҳо ва муассисаҳои олии касбӣ, шаҳрвандон, соҳибкорон дар рафти озмун аз он гувоҳӣ медиҳад, ки дониши ҳамаи табақаҳои аҳолӣ оид ба қонунгузории андоз давра ба давра васеътар гардида, сатҳи фарҳанги андозсупории онҳо баланд мешавад.
Мавриди зикр аст, ки озмуни ҷумҳуриявии “Маданияти андозсупорӣ – баҳои бофарҳангии ҷомеа” ҷузъи таркибии корҳои тарғиботиву ташвиқотии фарҳанги андозсупорӣ барои насли наврас ва дигар шаҳрвандон ба ҳисоб меравад. Дар маросим аз ҷониби роҳбарияти мақомоти андоз ғолибон ва иштирокчиёни фаъоли озмуни ҷумҳуриявии “Маданияти андозсупорӣ – баҳои бофарҳангии ҷомеа” бо Диплому Сипоснома, маблағҳои пулии дар Низомнома нишондодашуда ва туҳфаҳои хотиравӣ қадрдонӣ гардиданд.
Дар маросими тақдими мукофотҳо волидайни ғолибон Дилшод Эргашев, Аслон Толибов, Дилором Анорова аз рафти шаффофият ва ташкилу баргузории озмун ба роҳбарияти Кумитаи андози назди Ҳукумати Ҷумҳурии Тоҷикистон изҳори миннатдорӣ карданд.
30-солагӣ муборак бошад.
*Ҷашн муборак<
Муҳтарам Моҳира Абдуаҳадовна,
Бо самимияти афзун Шумо ва дар шахси Шумо ҷомеаи устодону муҳассилини Литсейи физикӣ — математикии №1 ба номи академик Муҳаммад Осимии шаҳри Хуҷандро ба муносибати ҷашни 30 – солагии таъсиси маъвои бонуфузи илму маърифат сидқан табрику таҳният мегӯям.
Ҷашни ин боргоҳи илму маърифат ҷашни аҳли зиёи вилоят аст. Зеро ин махзани маърифат аз меваҳои шаҳдбори даврони соҳибистиқлолии кишвар буда, дар рушду нумӯи соҳаи маориф сазоворона саҳм гирифта меояд. Ин махзани илму маърифат аз рӯзҳои нахустини фаъолият дар таълиму тарбияи насли ояндасози кишвар ба дастовардҳои назаррас соҳиб гардида, аз зумраи беҳтарин муассисаҳои таълимӣ шинохта шудааст. Боиси ифтихору сарфарозии омӯзгорону хонандагони литсей аст, ки Асосгузори сулҳу ваҳдати миллӣ — Пешвои миллат, Президенти мамлакат муҳтарам Эмомалӣ Раҳмон зимни суханрониашон дар маросими ифтитоҳи бинои Мактаби Президентӣ барои хонандагони болаёқати шаҳри Бӯстон нақши ин маъвои маърифатро бобати саводу маърифати баланд, ҷаҳонбинии васеъ, дастовардҳои хонандагон дар олимпиадаҳои бонуфузи байналхалқию ҷумҳуриявӣ алоҳида таъкид доштаанд. Дар партави ин баҳои арзандаи Пешвои муаззами миллат хонандагони литсей мунтазам дар озмуну олимпиадаҳои фаннии шаҳриву вилоятӣ, ҷумҳуриявию байналмилалӣ шуҳрати боргоҳи маърифатро пайваста баланд мебардоранд.
Ба Ҷоизаи давлатии Ҷумҳурии Тоҷикистон барои олимону омӯзгорони фанҳои табиатшиносӣ, дақиқ ва риёзӣ сазовор гардидани устодони дабистон Ҳусейн Ачилов ва Шаҳло Ҳошимова ба Ҷоизаи Раиси вилоят , ба дарёфти унвони ифтихории “Муаллими соли Тоҷикистон — 2019” мушарраф шудани омӯзгори фанни забони англисӣ Дилафрӯз Умарзода далели раднопазири дастовардҳои назарраси ҷомеаи меҳнатӣ маҳсуб меёбад.
Шогирдону омӯзгорони арҷманд, соҳибҷашнҳои гиромӣ!
Бо камоли эҳтиром ва садоқати бепоён Шумоёнро аз номи кулли маорифчиёни вилоят бо ҷашни саиду фархунда – 30-умин солгарди таъсисёбии махзани илму маърифат табрику таҳният гуфта, дар ин рӯзи пурнишот ва ҳама рӯз бароятон дар тарбияи арзандаи насли ҷавони кишвари маҳбуб равнақу барорҳо орзу менамоям.
Ҷамъбасти даври вилоятии озмуни «Сабз бодо кишварам»
Пеш аз оғози маросими қадршиносӣ дар саҳни ҳудуди Маркази таҳсилоти иловагии вилоят намоиши ҳунарҳои мардумии маҳфилҳои кулолгарӣ, рассомӣ, сӯзанидӯзии дастӣ ва дигар намуди корҳо ва гулҳои парваришгардидаи хонандагони аъзоёни маҳфилҳои марказ ташкил ва пешкаш карда шуд. Дар оғози маросими қадршиносӣ бо суханони ифтитоҳӣ сардорони Раёсатҳои маориф ва ҳифзи муҳити зисти вилоят барои иштироки фаъолонаи хонандагони муассисаҳои таълимии вилоят дар озмуни ҷумҳуриявӣ ва вилоятӣ баҳои баланд дода, ҷиҳати минбаъд ташаккул додани мавқеи фаъоли мактаббачагон дар соҳаи ҳифзи муҳити зист ва ҷалби онҳо ба ҳалли муаммоҳои экологӣ изҳори ақида намуданд.
Барои гирифтани ҷойҳои намоён аз рӯи 6 номинатсия — «Расми беҳтарин»,«Шеъри беҳтарин», «Сурати беҳтарин», «Ҳикояи беҳтарин», «Видеоролики беҳтарин» ва «Кори меъмории беҳтарин», 27 нафар хонандагони муассисаҳои таҳсилоти миёнаи умумӣ аз шаҳру ноҳияҳои Хуҷанд, Конибодом, Панҷакент, Б.Ғафуров, Ашт, Спитамен, Деваштич бо диплому ифтихорнома ва тӯҳфаҳо қадрдонӣ карда шуданд.
ДАСТОВАРДРО АФЗУН МЕБОЯД
Дар толори маҷлисгоҳи Гимназияи рақами 1-и ба номи Раҳим Ҷалили шаҳри Хуҷанд ҷаласаи навбатии ҳайати мушовараи Раёсати маорифи вилоят бо иштироки сарварони раёсат ва мудирони шуъбаҳои маорифи шаҳру ноҳияҳо, роҳбарони зерсохторҳои назди Раёсати маорифи вилоят доир гардид.
Ҷаласаро сардори Раёсати маорифи вилоят Осим Каримзода ифтитоҳ бахшида, иштирокдоронро бо рӯзномаи кории ҷаласа ошно намуд. Мавсуф фаъолияти семоҳаи маорифчиёнро мавриди таҳлил қарор дода, қайд намуд, ки ҷомеаи меҳнатии маорифчиёни вилоят ҳанӯз таҳти таассуроти баланд аз сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд қарор дошта, тибқи дастуру ҳидоятҳояшон ҷиҳати истиқболи сазовори 30 — солагии Истиқлолияти давлатии Ҷумҳурии Тоҷикистон кӯшиш ба харҷ дода истодаанд.
Дар идомаи кори ҷаласаи мушовара оид ба санҷиши таъмини иҷрои «Барномаи маҳаллии маҷмӯии рушди тарбияи ҷисмонӣ ва варзиш дар вилоят барои солҳои 2017-2021» ва омӯзиши фанни омодагии дифои ҳарбӣ дар муассисаҳои таълимии шаҳру ноҳияҳои Истиқлол, Мастчоҳ ва Бӯстон, санҷиши рафти қарори Ҳукумати Ҷумҳурии Тоҷикистон аз 31 марти соли 2020, №199 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2020-2021» дар муассисаҳои таълимии шаҳру ноҳияҳои Бӯстон, Мастчоҳ ва Зафаробод, оид ба рӯзҳои Раёсати маорифи вилоят, санҷиши сатҳу сифати таҳсилот ва татбиқи Амри Президенти Ҷумҳурии Тоҷикистон, аз 05.02.2020, №АП-1339 доир ба гузаронидани озмуни ҷумҳуриявии “Фурӯғи субҳи доноӣ китоб аст” дар муассисаҳои таълимии ноҳияи Мастчоҳ сармутахассисони Раёсати маорифи вилоят Мирҷумъа Бобозода, Шуҳрат Сатторов ва Абдураҳим Қурбонов гузориш доданд.
Дар бораи фаъолияти созмони хонандагони муассисаҳои таълимии шаҳру ноҳияҳои Истаравшан, Конибодом, Деваштич гузориши Фирдавс Ашурматов, директори Маркази таҳсилоти иловагии вилоят шунида шуд.
Корманди Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Васлибек Назриён оид ба пешгирӣ ва бартараф намудани ҳуқуқвайронкуниҳои ба ҳолатҳои коррупсионӣ мусоидаткунанда дар соҳаи маориф маълумот дод.
Дар хотимаи ҷаласа сардори Раёсати маорифи вилоят Осим Каримзода ҷиҳати баланд бардоштани сатҳ ва сифати таълиму тарбияи насли наврас, тақвияти фаъолият дар партави дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сухан ронда, аз масъулин даъват ба амал овард, ки барои афзун намудани дастовардҳо ҳарчи бештар аз имкониятҳои мусоид истифода баранд.
ОЗМУНИ ВИЛОЯТИИ «МАЛИКАИ НАВРӮЗӢ» БАРГУЗОР ГАРДИД
Дар асоси иҷроиши нақшаи чорабиниҳои қарори Раиси вилояти Суғд аз 29.01.2021, №44 доир ба таҷлили Иди байналмиллалии Наврӯз — 2021 дар Қасри фарҳанги ҷамоати деҳоти ба номи Ҳайдар Усмонови ноҳияи Бобоҷон Ғафуров даври вилоятии озмуни «МАЛИКАИ НАВРӮЗӢ» аз ҷониби Маркази таҳсилоти иловагии вилояти Суғд ташкил ва баргузор гардид. Дар чорабинии мазкур Сардори Раёсати маорифи вилоят муҳтарам Каримзода Осим Қосимӣ иштирок намуда, ҳадафи асосии озмуни мазкурро фароҳам овардани шароит барои инкишофи истеъдоди шахсият, баланд бардоштани дарки зебоипарастии кӯдакону наврасон ва ҳавасманд намудани онҳо ба касбу ҳунар унвон намуданд. Мафсуф зимни баромади хеш иброз доштанд, ки озмуни мазкур 5 сол инҷониб баргузор мегардад ва ба озмунҳои дӯстдоштании хонандагон табдил ёфтааст. Инчунин барои ташкили сатҳи баланди чорабинӣ ба масъулин баҳои баланд доданд.
Баъди маросими расмӣ ба саҳна 18 маликаҳои Наврӯзӣ аз 18 шаҳру ноҳияҳои вилоят даъват карда шуданд ва дар асоси қуррапартоӣ Маликаҳои Наврӯзӣ аз рӯи 5 шарт: хондани шеър дар васфи Наврӯз, иҷроиши рақс ва ё хондани тарона, истеъдоди ман(муаррифии истеъдод ва ҳунарҳои азбарнамуда), намоиши либоси дӯхти худи иштирокчӣ аз рӯи тарҳ ва дизайни Наврӯзӣ ва байтбарак бо ҳа
м қувваозмоӣ намуданд. Инчунин тибқи Низомнома ба доштани гесӯи дароз ва қади баланд имтиёзи иловагӣ ба ҳар як иштирокчӣ дода шуд.
м қувваозмоӣ намуданд. Инчунин тибқи Низомнома ба доштани гесӯи дароз ва қади баланд имтиёзи иловагӣ ба ҳар як иштирокчӣ дода шуд.
Дар натиҷаи ҷамъбасти озмун беҳтаринҳо муайян карда шуданд:Шоҳҷоиза: Азимова Мафтуна — хонандаи синфи 10, МТМУ №1 ноҳияи Деваштич;
Ҷойи 1. Умарова Лайло — хонандаи синфи 10, МТМУ №33 ноҳияи Ҷаббор Расулов,
Мӯсозода Робия — хонандаи синфи 10, МТМУ №7 шаҳри Панҷакент,
Олимова Суман хонандаи синфи 11 МТМУ №36 нохияи Ашт;
Ҷойи 2. Исмоилова Мадинаҳ — хонандаи синфи 10,МТМУ №13 ноҳияи Бобоҷон Ғафуров,
Паризод Турсунова- хонандаи синфи 11, МТМУ №7 шаҳри Гулистон,
Малика Латипова — хонандаи синфи 10, Гимназияи №2 шаҳри Бӯстон;
Ҷойи 3. Саида Содиқова — хонандаи синфи 10, Гимназияи №24 шаҳри Хуҷанд,
Маъмурова Моҳчеҳра — хонандаи синфи 11, МТМУ №12 ноҳияи Зафаробод
Абдуаҳатова Шаҳноза — хонандаи синфи 11, МТМУ №2 шаҳри Истиклол.
Ғолибони озмун бо Дипломи дараҷавӣ ва тӯҳфаҳои хотиравӣ қадршиносӣ карда шуда, инчунин тамоми иштирокчиёни даври вилоятӣ бо Сипосномаи Раёсати маорифи вилоят қадр карда шуданд.ОЗМУНИ ВИЛОЯТИИ ДАСТАРХОНИ НАВРУЗИИ «ҲАФТ СИН ВА ҲАФТ ШИН» БЕҲТАРИНҲОРО МУАЙЯН НАМУД.
Таърихи 16 марти соли ҷорӣ дар асоси иҷроиши нақшаи чорабиниҳои қарори Раиси вилояти Суғд аз 29.01.2021, #44 доир ба таҷлили Иди байналмиллалии Наврӯз — 2021 дар Қасри фарҳанги ҷамоати деҳоти ба номи Ҳайдар Усмонови ноҳияи Бобоҷон Ғафуров даври вилоятии озмуни Беҳтарин дастархони Наврӯзии «Ҳафт син ва ҳафт шин» аз ҷониби Маркази таҳсилоти иловагии вилояти Суғд ташкил ва баргузор гардид. Дар чорабинии мазкур Сардори Раёсати маорифи вилоят муҳтарам Каримзода Осим Қосимӣ иштирок намуда, ба хони Наврӯзии хонандагони муассисаҳои таълимии вилоят баҳои баланд доданд.
Дар чорабинии мазкур 16 даста аз шаҳру ноҳияҳои вилоят анвои гуногуни хӯрокаи миллии тоҷиконаро ба маърази тамошо гузоштанд, ки аксари хӯрокҳо аз ҷониби аъзоёни маҳфилҳои «Рӯзғордорӣ»-и Марказҳои таҳсилоти иловагии шаҳру ноҳияҳои вилоят омода карда шуда буд.
Ҳайяти ҳакамони озмуни вилоятӣ дар асоси Низомномаи озмун беҳтаринҳоро муайян намуданд ва озмун чунин натиҷа дод:
Ҷойи 1 — Дастаи хонандагони муассисаҳои таълимии шаҳри Панҷакент
Ҷойи 2. — Дастаҳои хонандагони муассисаҳои таълимии шаҳрҳои Хуҷанд, Исфара ва ноҳияи Ашт
Ҷойи 3. — Дастаҳои хонандагони муассисаҳои таълимии шаҳри Гулистон ва ноҳияҳои Спитамен ва Ҷаббор Расулов
Ҳамзамон барои иштироки фаъолона тамоми иштирокчиён бо Сипосномаи Раёсати маорифи вилоят қадршиносӣ карда шуданд. Дастаҳои ғолиб бо Дипломҳои дараҷавӣ ва тӯҳфаҳои хотиравӣ қадр карда шуданд.
МОДАРОН- ТАРОВАТБАХШИ ҲАЁТ
Дар Муассисаи давлатии мактаби президентии шаҳри Бустон бо иштироки собиқадорон, бонувони фаъолу барӯманди соҳаи маорифи вилоят ба ифтихори Рӯзи модар маҳфили идона баргузор гардид.
Чорабиниро сардори Раёсати маорифи вилоят Осим Каримзода ифтитоҳ бахшида, аз номи мақомоти иҷроияи ҳокимияти давлатии вилоят, шахсан аз номи Раҷаббой Аҳмадзода аҳли нишастро табрик намуд. Мавсуф дар идомаи суханронӣ зикр дошт, ки дар замони соҳибистиқлолии кишвар давлату Ҳукумати Тоҷикистон ба масъалаи баланд бардоштани мақому манзалати занону бонувон дар ҳаёти ҷомеа диққати аввалиндараҷа равона намудаанд. Гиромидошти Рӯзи Модар аз ҷониби Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон ибтидои рӯзгори хуш, рӯзи сабзгуну гулбези модарону бонувон арзёбӣ шудааст. Пешвои миллат зимни суханрониашон дар Паёми навбатӣ ба Маҷлиси Олии Ҷумҳурии Тоҷикистон нақши модаронро дар таҳким ва рушди ҷомеа, оила, таълиму тарбияи фарзандон муҳим арзёбӣ намуда, таъкид доштаанд, ки саҳми занон дар рушди соҳаҳои илму маориф ва тандурустии мамлакат торафт меафзояд. Имрӯз дар соҳаи маорифи кишвар 73 фоиз ва тандурустиву ҳифзи иҷтимоии аҳолӣ қариб 68 фоизро занону бонувон ташкил медиҳанд.
Раиси шаҳри Бӯстон Раъно Ҳошимзода бонувонро бо ин ҷашни баҳору зебо табрику таҳният гуфта, барояшон сарсабзиву саломатӣ, зиндагии пурхайру нишот, бахту иқбол, рӯҳи саршору тани нерӯманд ва пирӯзиҳову комгориҳои нав ба нав орзу намуд.
Дар идомаи чорабинӣ ғолибону иштирокдорони озмунҳои “Муаллими соли Тоҷикистон” ва “Мураббии соли Тоҷикистон”, омӯзгорону мураббияҳои навовару пешқадам бо Ифтихорномаю Сипосномаҳои мақомоти иҷроияи ҳокимияти давлатии вилоят, Раёсати маориф сарфароз гардонида шуданд.
Дар қисмати фарҳангии чорабинӣ аъзои дастаи ҳунарии назди Маркази таҳсилоти иловагии вилоят, хонандагони Муассисаи давлатии мактаби президентии шаҳри Бӯстон, ҳофизони мумтоз Дилрабо Қурбонова, Нозими Юсуфзод, Маҳками Баҳриддин ва дигарон бо суруду тарона ва рақсҳои марғуб хотири аҳли нишастро шод намуданд.
ҲАМКОРӢ БО ВАО МУФИД АСТ
Санаи 22 феврал дар партави Амри Президенти Ҷумҳурии Тоҷикистон азаз 15 сентябри соли 2011, таҳти №АП – 1729 нишасти матбуотии сардори Раёсати маорифи вилояти Суғд бо намояндагони воситаҳои ахбори омма баргузор гардид.
Дар нишасти матбуотӣ оид ба натиҷаҳои фаъолияти маорифчиёни вилоят дар соли 2020 ва вазифаҳои навбатии ҷомеаҳои меҳнатии муассисаҳои таълимӣ ҷиҳати баланд бардоштани сатҳу сифати таълиму тарбияи насли ояндасоз сухан рафт.
Сараввал сардори Раёсати маорифи вилоят Осим Каримзода бо суханони муқаддимавӣ нишастро ифтитоҳ бахшида, оид ба вазифаҳои маорифчиён дар партави Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон андешаронӣ намуд. Аз ҷумла мавсуф таъкид дошт, ки соли таҳсили 2019 — 2020 дар вилоят 938 муассисаи таҳсилоти умумӣ, аз ҷумла 4 муассисаи таҳсилоти ибтидоӣ, 36 муассисаи таҳсилоти асосӣ, 826 муассисаи таҳсилоти миёнаи умумӣ, 33 гимназия, 25 литсей, 1 мактаби Президентӣ, 2 мактаб барои хонандагони лаёқатманд, 3 мактаб — кўдакистон, 1 интернати санаторӣ, 4 мактаб — интернати махсус, 3 интернат барои кўдакони ятиму бепарастор фаъолият намуда, дар онҳо 565 ҳазору 231 нафар, аз ҷумла 276 ҳазору 427 нафар духтарон ба таълиму тарбия фаро гирифта шудаанд, ки нисбат ба соли таҳсили 2018 – 2019 — ум 9 муассисаи таълимӣ ва шумораи хонандагон 17 ҳазору 906 нафар зиёд мебошад.
Вобаста ба он ки ба хабарнигорон оиди фаъолияти маорифчиёни вилоят дар соли 2020 гузориши хаттии муфассал ( пресс- релиз) пешниҳод шуда буд, байни сардори Раёсати маорифи вилояти Суғд Осим Каримзода ва хабарнигорон бе ироаи маърӯза оид ба натиҷаҳои фаъолиияти маорифчиён дар соли 2020 якбора пурсишу посух сурат гирифт.
Дар рафти нишасти матбуотӣ хабарнигорони рӯзномаҳои “Садои мардум” М.Мақсудов, ”Тоҷикистон” Ф. Муродӣ, “Омӯзгор” Н.Раҷабзода, “Халқ овози” Ӯ. Усмонов, “Ҳақиқати Суғд” Ш.Салимова,”Нилуфар” Ф. Мамадҷонова, ШТР “Азия” М. Атаева, Оҷонсии “Суғднюс” М. Поччоева, М.Қаюмова, радиоҳои “Замон” А.Ҷӯраев, “Озодӣ” Ф.Машарифов, хабарнигори мустақил Қ. Аҳрор ва дигарон вобаста ба масъалаҳои мубрами соҳа, аз ҷумла, оид ба раванди пардохти қарзҳои классикии китобҳои иҷоравии муассисаҳои таълимӣ, фаъолияти маркази таҳсилоти иловагии вилоят дастовард ва нақшаҳои минбаъдаи он, тадбирҳои андешидашуда ҷиҳати пешгирӣ аз паҳншавии бемориии сироятии COVID -19, пардохти маош ва кӯмакпулиҳо ба омӯзгорон дар ин давра, омодагиҳо ба таҷлили ҷашни 110 — солагии шоири шаҳири тоҷик, Қаҳрамони Тоҷикистон Мирзо Турсунзода, тақдири донишҷӯёне, ки дар хориҷи кишвар таҳсили илм мекунанд дар давраи бемории Ковид -19, бунёди кӯдакистонҳо ва муассисаҳои томактабие, ки дар баҳсҳои судӣ ва ҳакамӣ қарор доранд, фаъолияти Планетарияи ба номи Абӯмаҳмуди Хуҷандӣ, таҷҳизонидани кабинетҳои фаннӣ, ҷойивазкунии кадрҳо, дастгирии мутахассисони ҷавон, пайвастани муассисаҳои таълимӣ ба шабакаи ягонаи гармидиҳӣ ва сабабҳои ба ҷиноят даст задани ноболиғон, раванди иҷрои нақшаи чорабиниҳо ба истиқболи ҷашни мубораки 30 – солагии Истиқлолияти давлатии Ҷумҳурии Тоҷикистон дар муассисаҳои таълимии вилоят бо саволҳо муроҷиат карданд.
Аз ҷониби сардори Раёсати маорифи вилоят Каримзода О.Қ. ба суолҳои матраҳшуда хеле возеҳ равшанӣ андохта шуда, бо мисолҳои мушаххас корҳои дар ин самт анҷомёфта шарҳу эзоҳ ёфтанд. Мавсуф зимни суханрониаш зикр намуд, ки таи шаш соли охир омӯзгорон ва мураббиёни вилоят дар озмунҳои ҷумҳуриявӣ ҷойҳои аввалро сазовор мешаванд. Теъдоди ҷоизадорони олимпиадаҳои байналмилалӣ рӯ ба афзудан оварда, дар ин радиф хонандагони шаҳрҳои Хуҷанд, Исфара ва ноҳияи Бобоҷон Ғафуров аз беҳтаринҳо маҳсуб меёбанд.
Инчунин ба дигар саволҳои марбут ба соҳа аз сардори Раёсати маориф хабарнигорон посухҳои мушаххас гирифтанд.
Сардори Раёсати маорифи вилоят Каримзода О.Қ. дар сухани хотимавиаш ба рўзноманигорон ҷиҳати иштироки фаъолонаашон дар нишаст ва барои ҳамкории муфидашон бо маорифчиёни вилоят самимона изҳори сипос кард.
Нишасти матбуотии сардори Раёсати маорифи вилояти Суғд бо намояндагони воситаҳои ахбори умум хеле пурманфиат ҷараён гирифт
ПАЁМ БА КОМЁБИҲО ҲИДОЯТ МЕНАМОЯД
Осим КАРИМЗОДА,
сардори Раёсати маорифи вилояти Суғд,
доктори илмҳои таърих, профессор
ПАЁМ БА КОМЁБИҲО ҲИДОЯТ МЕНАМОЯД
Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро, ки санаи 26 январи соли равон тариқи расонаҳои ахбори умум ироа гардид, сокинони ваҳдатшиори мамлакат бо ифтихори бузург ва шукргузории афзун аз давлату давлатдории миллӣ истиқбол намуданд.
Пешвои муаззами миллат дар баробари таҳлилу баррасии масъалаҳои мубрами соҳаи хоҷаги халқи мамлакат ба соҳаи маориф ба ҳайси самти афзалиятнок дар сиёсати маърифатпарваронаашон дар Паёми навбатӣ таваҷҷуҳ ва эътибори хосса зоҳир намуданд. Зеро соҳаи маориф дар меҳвари ҳамешагии сиёсати даватдории Пешвои миллат мақоми махсус дорад. Имрӯз ба ҳайси шахси масъули соҳаи маорифи вилоят бо як ҷаҳон ифтихору саодат таъкид мекунам, ки дар Паёмашон Пешвои миллат барои беҳдошти соҳа ғамхоронаю дилсӯзона ҳар яки мо, аҳли ҷомеаро вазифадор намудаанд: “Мо барои беҳтар кардани сатҳу сифати таълим дар ҳамаи зинаҳои таҳсилот бояд тамоми шароити заруриро муҳайё карда, дар ин раванд масъулияти падару модар, аҳли ҷомеа ва омӯзгорон боз ҳам баланд бардорем”. Ин ҳидояти созандаи Сарвари давлат мо, кормандони соҳаи маорифро барои пешбурди фаъолият боз ҳам дилгарм ва масъулиятамонро дар роҳи иҷрои вазифа афзунтар мекунад.
Аҳли маорифи кишвар бори дигар боварӣ ҳосил карданд, ки тақдири имрӯзу ояндаи мактабу маориф барои давлат ва Ҳукумати кишвар бефарқ нест. Президенти кишвар, Пешвои миллат бо як эҳсосоти баланд дар ин бора сухан ронда, таъкид доштанд, ки пешбурди фаъолияти соҳаҳои гуногуни мамлакатамон бар дӯши кадрҳои баландихтисоси соҳа меистад.
Ҳамагон хуб дар хотир дорем, ки туфайл ғамхории ҳамешагии Пешвои миллат заминаи моддию техникии муассисаҳои соҳаи маориф мустаҳкам гардида, шароити таълиму тарбия рӯ ба беҳбудӣ меоранд.
Ин ғамхорӣ дар он ифода мегардад, ки танҳо соли гузашта дар кишвар 157 муассисаи таҳсилоти миёнаи умумӣ, ибтидоӣ, миёнаи касбӣ ва синфхонаҳои иловагӣ барои 63000 ҷойи нишаст бунёд ва ба истифода супорида шуданд. Умуман, дар маҷмӯъ, аз соли 1991 то ба имрӯз дар мамлакат 3020 иншооти соҳаи маориф бо зиёда аз 1 миллиону 300 ҳазор ҷойи нишаст сохта, мавриди истифода қарор гирифтааст.
Яке аз нақшаҳои дурнамои соҳа, ки дар мадди назари ҳамешагии давлату Ҳукумат қарор дорад, ин масъалаи баланд бардоштани мавқеъ ва мақоми омӯзгор мебошад. Ба шарофати иқдомҳои ҳамешагии давлат ва Ҳукумат мақоми омӯзгорон торафт боло меравад ва эшон чун дар даврони шӯравӣ ба ҳайси раҳнамову тӯдакаши аҳли ҷомеа эътироф гардидаанд.
Хушбахтона, таҳти сиёсати хирадмандонаву маорифпарваронаи Пешвои миллат бо мақсади таъмини шаффофият, адолат, баланд бардоштани сатҳи тарбияи кадрҳо ва пешгирӣ кардани амалҳои коррупсионӣ дар миқёси ҷумҳурӣ соли ҳаштум аст, ки низоми нави дохилшавӣ ба мактабҳои олӣ тариқи Маркази миллии тестӣ ба роҳ монда шуд. Ин тадбири муфид имкон дод, ки беҳтарин хонандагони мактабҳо тавассути дониши худ ба номи баланди донишҷӯи сазовор шаванд. Маҳз ҳамин омил боис шуд, ки сафи хонандагони аълохону боистеъдод дар муассисаҳои таълимӣ рӯ ба афзоиш ниҳад. Аммо бо вуҷуди корҳои назарраси иҷрошуда ҳанӯз мушкиливу муаммоҳои соҳа зиёданд. Аз ҷумла, яке аз онҳо сол то сол кам шудани шавқу рағбати хонандагон ба фанҳои дақиқ мебошад. Аксари олимони ҷавоне, ки солҳои охир рисолаи номзадиро ҳимоя кардаанд, мутахассиси фанҳои ҷамъиятиву гуманитарӣ мебошанд.
Бо назардошти тақвияти дониши техникӣ, рӯ овардани ҷавонон ба илмҳои равияи дақиқ «Солҳои 2020 – 2040 солҳои омӯзиш ва рушди илмҳои табиатшиносӣ, дақиқ ва риёзӣ дар соҳаи илму маориф» эълон гардид. Ҳамзамон, ба хотири боз ҳам бештар ба омӯзиши илмҳои риёзиву дақиқ ва табиӣ ҷалб гардидани наврасону ҷавонон, олимону муҳаққиқон ва устодону омӯзгорон аз ҷониби Пешвои миллат дар Паёмашон ҳамасола баргузории озмуни ҷумҳуриявӣ таҳти унвони “Илм – фурӯғи маърифат” эълон шуд, ки гумон мекунам дар радифи озмунҳои “Фуруғи субҳи доноӣ китоб аст” ва “Тоҷикистон, Ватани азизи ман” обрӯ ва нуфузи хеле калон касб мекунад.
Ба суръати умум пеш рафтани техникаву технология ва ҷойгоҳи хосаро дар рӯзгори мардум касб кардани воситаҳои муосири техникӣ, эҳтиёҷ ба кадрҳои баландихтисоси соҳаро ба назар гирифта, Пешвои муаззами миллат дар Паёмашон масъулинро вазифадор мекунанд, ки ҷиҳати ҳарчи бештар ба хориҷи кишвар фиристодани ҷавонони боистеъдоду лаёқатманд аз рӯи равияи илмҳои дақиқ, риёзӣ ва табиӣ «Барномаи тайёр кардани кадрҳои ҷавони илмӣ барои солҳои 2021 – 2030»–ро таҳия карда, дар муддати се моҳ ба Ҳукумати мамлакат пешниҳод намоянд.
Кӯдакон фардои ин миллати босаодатанд ва роҳбарону масъулин дар ин росто дастур гирифтанд, ки дар муддати кӯтоҳ дар деҳот муассисаҳои таълимии томактабӣ, майдончаҳои варзишӣ бунёд намоянд. Дар Паём таъкид гардид, ки соли гузашта ҳамагӣ 14 муассисаи томактабӣ барои 2520 кӯдак бунёд гардидааст, ки ин нишондиҳанда ҷавобгӯи талаботи рӯз нест. Пешвои муаззами миллат ба роҳбарони вазорати маориф ва илм, рушди иқтисод ва савдо, молия, Кумитаи давлатии сармоягузорӣ ва идораи амволи давлатӣ, раисони вилоят ва шаҳру ноҳияҳо дастур доданд, ки барои бунёди кӯдакистонҳо, марказҳои инкишофи кӯдакон тадбирҳои зарурӣ роҳандозӣ намоянд. Ин башоратест, ки аз ояндаи дурахшони соҳаи муассисаҳои томактабӣ дарак медиҳад ва маорифчиёнро рӯҳбаланду сарфароз мегардонад.
Пешвои муаззами миллат дар мавриди гиромидошти забон, рӯ ба китобу китобхонӣ овардани ҳамаи қишрҳои ҷомеа, огоҳ будан аз гузаштаи пурғановати таърихи тоҷикон сухан карданд. Изҳор доштанд, ки “Мо бояд ба рушди забони шево ва шоиронаи тоҷикӣ низ эътибори аввалиндараҷа диҳем. Чунки забони давлатӣ яке аз сарватҳои муқаддас ва гаронбаҳотарини мо мебошад”. Роҳандозӣ шудани озмуни ҷумҳуриявии “Фурӯғи субҳи доноӣ китоб аст” маҳз аз ҳамин нуктаи назар сарчашма мегирад ва он барои шинохти асолати миллӣ, худшиносию худогоҳӣ ва ҳуввияти миллӣ нақши мондагор дорад.
Дар масъалаи дуруст ба роҳ мондани забономӯзӣ аз қабили забони тоҷикӣ ва забонҳои хориҷӣ сухан ронда, иқтибосеро аз Паёми президенти кишвар хотирнишон сохта, чунин баён менамоям, ки ба роҳбарони вазоратҳои маориф ва илм, рушди иқтисод ва савдо, инчунин ректорони муассисаҳои таҳсилоти олӣ супориш дода мешавад, ки дар давоми чор соли оянда масъалаи пурра бо омӯзгорони фанҳои дақиқ, технологияҳои иттилоотӣ ва забонҳои хориҷӣ, дар навбати аввал, русиву англисӣ таъмин кардани муассисаҳои таҳсилоти умумиро ҳал намоянд.
Инчунин, ҷиҳати ташкили курсҳои такмили ихтисос ва бозомӯзии муаллимон мунтазам чораҷӯӣ карда, доир ба вазъи корҳо дар ин самт ба Ҳукумати мамлакат ҳар сол гузориш диҳанд.
Вазифаҳое, ки дар суханрониҳои Президенти кишвар доир ба ҳалли масъалаҳои калидӣ, расидан ба ҳадафҳои стратегӣ ва афзалиятҳои миллӣ барои оянда гузошта шуданд, танҳо ба хотири рушди иқтисодию иҷтимоии давлатамон, таҳкими имкониятҳои иқтисодии он ва албатта, ба хотири боз ҳам беҳтар шудани сатҳи некӯаҳволии халқамон равона гардидаанд.
Дар ин замина агар ба мушоҳида гирем, эҳсос мешавад, ки аз Паём то Паём дар ҳама ҷанбаҳои хоҷагии халқ, аз ҷумла дар соҳаи маориф дастовардҳои зиёде ба назар мерасанд. Масалан, дар Паёми соли гузашта Пешвои миллат аҳли маорифи кишварро ҷиҳати ворид шудан ба фазои ягона ва ҷорӣ намудани меъёри ягонаи таҳсилот, истифодаи васеи технологияҳои иттилоотиву коммуникатсионӣ дар ҷараёни таълим вазифадор карда буданд.
Болоравии сифати таълиму тарбия, аз ҷумлаи ҳадафҳои стратегии давлат дар соҳаи маориф маҳсуб мегардад. Ғамхориҳои бевоситаи Пешвои миллат ва давлату Ҳукумат вазифаҳои мо — аҳли маорифро барои боз ҳам баланд бардоштани сифати таълиму тарбия, тайёр намудани мутахассисони ба бозори меҳнат рақобатпазир муайяну мушаххас менамояд.