Сардори Раёсати маорифи вилоят Осим Каримзода субҳи имрӯз сафири Фавқулода ва Мухтори Ҷумҳурии Фаронса дар Ҷумҳурии Тоҷикистон ҷаноби Мишел Тарран ва корманди сафорат Лола Рожеро ба ҳузур пазируфт.
Дар мулоқот ҷонибҳо аз муносибатҳои дуҷониба дар соҳаи маориф гуфтугузор намуда, мақсади вохӯриро дар густариш додани самтҳои илму таълим арзёбӣ намуданд. Зимни мулоқот ҷонибҳо оид ба омӯзиши забони фаронсавӣ, тарбияи кадрҳо, таҷрибаивазкунӣ, ташкил намудани курсҳои забономӯзӣ ва ҳамоишҳои байналмилалӣ, инчунин, беҳтар намудани барномаҳои муштарак табодули афкор намуданд.
Дар суханронии Осим Каримзода қайд шуд, ки ба шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мактабу маориф сол аз сол рушд карда, сатҳи таълиму тарбия ва омӯзиши забонҳои хориҷӣ дар сатҳи лозима ба роҳ монда шудааст. Айни ҳол зиёда аз 300 нафар хонандагони шаҳру ноҳияҳои Панҷакент ва Зафаробод ба омӯзиши забони фаронсавӣ ҷалб гардида, бо дарёфти имкон ва шароит сатҳи омӯзиши ин забон беҳтар гардонида мешавад. Номбурда аз таҷрибаи ғании омӯзиши забони олмонӣ дар вилоят дар мисоли муассисаҳои таълимии “Гёте” ва “Сафина” ёдовар шуда, афзуд, ки маҳз таваҷҷуҳи мақомоти иҷроияи ҳокимияти давлатии вилояти Суғд бо роҳбарии Раиси вилоят Раҷаббой Аҳмадзода ва шарикони рушд аз давлати Олмон аст, ки омӯзиши ин забон дар сатҳи лозима ба роҳ монда шудааст.
Сафири Фавқулода ва Мухтори Ҷумҳурии Фаронса ҷаноби Мишел Тарран аз пазироии самимии Раиси вилояти Суғд муҳтарам Раҷаббой Аҳмадзода ба вилояти Суғд изҳори миннатдорӣ намуда, баён дошт, ки дар сафари навбатии худ аз маконҳои таърихии вилоят амсоли Панҷакент ва Зафаробод дидан мекунад. Гуфта шуд, ки забони фаронсавӣ дар қатори 6 забонҳои байналмилалии ҷаҳонӣ дар Созмони миллати муттаҳид эътироф гардида, айни ҳол наздик ба 200 миллион нафар бо ин забони нобу шево ҳарф мезананд. Забони фаронсавӣ чун забони давлатии Белгия, Шветсария ва Люксембург дониста шудааст. Мақсади мо тақвият бахшидани забони фаронсавӣ дар Ҷумҳурии Тоҷикистон ва ба ин васила ошноӣ пайдо кардани толибилмони тоҷик аз фарҳанги бою ғании кишвари Фаронса мебошад.
Дар
баромади Лола Роже қайд шуд, ки айни ҳол дар ҷумҳурӣ 60 омӯзгори фанни забони фаронсавӣ фаъолият доранд, ки ба онҳо мунтазам семинарҳои омӯзишӣ ташкил карда мешавад. Мушкилоти асосии дар омӯзиши забони фаронсавӣ ин норасогии китобҳои дарсӣ мебошад, ки сафоратхона ин муамморо дар вақтҳои наздик ҳал мекунад. Ба гуфтаи Лола Роже зиёд кардани синфҳои омӯзишии забони фаронсавӣ дар меҳвари фаъолияти сафорати Фаронса дар Ҷумҳурии Тоҷикистон аст.
Дар охир аз ҷониби сардори Раёсати маорифи вилоят ба меҳмонон ҳамчун рамзи дӯстӣ туҳфаи хотиравӣ тақдим гардид
Навигарӣ
ДУ ДАСТАИ ВИЛОЯТИ СУҒД ДАР ДАВРИ ҶУМҲУРИЯВИИ ОЛИМПИАДАИ БАЙНАЛМИЛЛАЛИИ РОБОТОТЕХНИКӢ (WRO) СОҲИБИ ШОҲҶОИЗА ГАРДИДАНД.
Санаи 24.01.2021 дар Литсей №3 барои хонандагони болаёқат дар шаҳри Душанбе даври ҷумҳуриявии олимпиадаи байналмиллалии робототехникӣ WRO(World Robot Olimpiad) баргузор гардид. Дар қатори беш аз 10 даста аз шаҳри Душанбе ба даври ҷумҳуриявии озмун 2 даста аз вилояти Суғд: дастаи маҳфили «Робототехникӣ» — и Маркази таҳсилоти иловагии вилояти Суғд ва Лигаи Роботи шаҳри Хуҷанд ба даври ҷумҳуриявии озмун роҳхат гирифта, иштирок намуданд. Дар натиҷа дастаи Маркази таҳсилоти иловагии вилояти Суғд дар номинатсияи «Муҳандиси беҳтарини робототехникӣ» ғолибиятро ба даст оварда, сохиби «Шоҳҷоиза» гардид. Ҳамчунин дастаи Лигаи Роботи шаҳри Хуҷанд дар номинатсияи «Амали беҳтарини дастаҷамъона» маҳорати баланд нишон дода, соҳиби «Шоҳҷоиза» гардид.
Лозим ба таъкид аст, ки дар дастаи Маркази таҳсилоти иловагии вилоят Суғд Раҳимов Абдураҳмон — хонандаи синфи 7, Гимназияи Сафинаи ноҳияи Бобоҷон Ғафуров хуб ҳунарнамоӣ намуд ва аз дастаи Лига Роботи шаҳри Хуҷанд Набиева Саиднисо — хонандаи синфи 7, МТМУ №28,
Ҳакимов Сайфиддин — хонандаи синфи 8, МТМУ #20, Пӯлотов Улуғбек — хонандаи синфи 9, МТМУ# 22 ҳамагӣ аз шаҳри Хуҷанд барандаи озмун гардиданд.
Ба ғолибон Диплом, туҳфаҳои хотиравӣ ва Сертификати иштирокчии даври ҷумҳуриявии озмун тақдим карда шуд.
Олимпиадаи байналмиллалии робототехникӣ WRO дар Тоҷикистон таи 2 сол аст, ки бо ибтикори Вазорати маориф ва илми Ҷумҳурии Тоҷикистон бо дастгирии Лигаи Роботҳои шаҳри Душанбе ташкил ва баргузор мегардад. Ҳадафи ташкили озмун рушди малакаҳои техникии насли наврас, дарёфти кӯдакони болаёқат ва ҷалби бештари кӯдакон ва наврасон ба ихтироъкориву навоварӣ мебошад. Дар ҳаракати олимпии Олимпиадаи байналмиллалии робототехникӣ 70 кишвари олам шомил буда, ҳамасола озмуни мазкур дар сатҳи баланд ташкил ва баргузор мегардад.
Соли 2020 бо иқдоми роҳбарияти Маркази таҳсилоти иловагии вилояти Суғд намояндагии ин ташкилоти бонуфуз дар вилояти Суғд созмон дода шуда, дастаҳои вилояти Суғд низ имкони иштирокро дар чунин озмуни сатҳи ҷаҳонӣ пайдо намуданд.
Лозим ба таъкид аст, ки дастаи маҳфили «Робототехникӣ» — и Маркази таҳсилоти иловагии вилояти Суғд таҷрибаи кофии иштирокро дар чунин озмунҳои сатҳи чаҳонӣ дорад ва соли 2019 аъзоёни маҳфил дар озмунҳои ҷаҳонӣ дар шаҳри Дубайи Аморати Муттаҳидаи Араб ва Бишкеки Кирғизистон иштирок намуда, кишвари Тоҷикистонро шоиста муаррифӣ намуда буданд.
Бо бадастовардани Шоҳҷоиза дастаҳои вилояти Суғд ҳуқуқи иштирокро дар даври байналмиллалии озмун пайдо намуданд.
Шуъбаи иттилоот ва таҳлили Маркази таҳсилоти иловагии вилоят Суғд
ФАЪОЛИЯТ ҶАМЪБАСТ ВА ВАЗИФАҲО МУАЙЯН ГАРДИДАНД
Дар маҷлисгоҳи Гимназияи №1 ба номи Раҳим Ҷалили маркази вилоят бо иштироки сардорони раёсат, мудирони шуъбаҳои маориф, директорони Марказҳои дарёфт ва рушди истеъдодҳо, технологияи иттилоотӣ ва коммуникатсионӣ, таҳсилоти иловагӣ, кабинетҳои методии шаҳру ноҳияҳо ҷаласаи ҳайати мушовара оид ба ҷамъбасти фаъолияти Раёсати маорифи вилоят дар соли 2020 ва вазифаҳо барои соли 2021 баргузор гардид.
Ҷаласаро сардори Раёсати маорифи вилоят Осим Каримзода ифтитоҳ намуда, бардоштҳои хешро аз ҷаласаи ҷамъбастии фаъолияти хоҷагии халқи вилоят оид ба натиҷаҳои соли сипаригардида баён дошта, ҳозиринро бо рӯзномаи кори ҷаласа ошно кард. Сипас ҳисоботи Раёсати маорифи вилоят дар соли 2020 шунида шуда, вазифаҳо барои соли равон муқаррар гардиданд.
Зимни музокира сардорони раёсат ва мудирони шуъбаи маорифи шаҳру навоҳии Истаравшан Диловар Азимов, Исфара Бобохон Саидов, Панҷакент Алишер Мутрибов, Гулистон Нурмуҳаммад Мирзоев, Деваштич Ботур Расулов оид ба натиҷаҳои фаъолият дар соли сипаришуда андешаҳо баён доштанд. Сардори Раёсати маорифи вилоят Осим Каримзода ҷиҳати ислоҳи камбудӣ ва боз ҳам пешрав гардидани фаъолияти маорифчиёни шаҳру ноҳияҳои зикршуда дастуру супоришҳои мушаххас дод.
Корманди масъули Прокуратураи вилоят Донохон Ҷӯраева аз натиҷаҳои санҷиши прокурорӣ дар мавриди дафтардорӣ, таъмини иҷроиши санадҳои меъёрию ҳуқуқӣ, ба танзим даровардани маблағгузории сарикасӣ, роҳ надодан ба таъиноти шахсони масъули молиявӣ дар муассисаҳои таълимӣ аз ҳисоби хешовандони наздик ва ғайра гузориши муфассал ироа дошт.
Сипас, нақшаи кории Раёсати маорифи вилоят барои нимсолаи аввали соли 2021 аз ҷониби ҳозирин тасдиқ гардида, оид ба натиҷаҳои рӯзҳои Раёсати маорифи вилоят, санҷиши сатҳу сифати таҳсилот ва рафти иҷрои қарори Ҳукумати Ҷумҳурии Тоҷикистон аз 29 октябри соли 2017, №544 «Дар бораи Барномаи давлатии таъмини муассисаҳои таҳсилоти умумии ҷумҳурӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2018-2020» дар муассисаҳои таълимии ноҳияи Ҷ.Расулов, рафти баргузории аттестатсияи кормандони соҳаи маорифи ноҳияҳои Зафаробод, Ҷаббор Расулов ва Мастчоҳ сармутахассиси шуъбаи кадрҳо ва корҳои махсуси Раёсати маорифи вилоят Сафия Каримова ибрози андеша намуд.
Сармутахассиси шуъбаи кадрҳо ва корҳои махсуси Раёсати маорифи вилоят Абдураҳим Қурбонов оид ба натиҷаҳои рӯзҳои Раёсати маорифи вилоят, санҷиши сатҳу сифати таҳсилот ва рафти иҷрои қарори Ҳукумати Ҷумҳурии Тоҷикистон аз 3 июли соли 2014, №427 «Дар бораи Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои солҳои 2015-2020» дар муассисаҳои таълимии шаҳри Истаравшан, дар мавриди баррасии маълумоти Раёсати Агентии назорат дар соҳаи маориф ва илми назди Президенти Ҷумҳурии Тоҷикистон дар вилояти Суғд “Оид ба натиҷаи санҷиши фаъолияти муассисаҳои таълимии вилояти Суғд зимни аттестатсияи таълимгоҳҳо” суханронӣ намуд.
Оид ба натиҷаи рӯзҳои Раёсати маорифи вилоят, санҷиши сатҳу сифати таҳсилот ва рафти иҷрои қарори Ҳукумати Ҷумҳурии Тоҷикистон аз 29.09.2017, № 443 “Дар бораи Барномаи давлатии амалӣ намудани технологияҳои иттилоотӣ – коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2018-2022” дар муассисаҳои таълимии ноҳияи Деваштич бошад, мутахассиси пешбари Раёсати маорифи вилоят Шӯҳрат Сатторов гузориш дод.
Аз рафти амалишавии қарори Ҳукумати Ҷумҳурии Тоҷикистон аз 29.09.2017, № 443 “Дар бораи Барномаи давлатии амалӣ намудани технологияҳои иттилоотӣ – коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2018-2022” дар муассисаҳои таълимии шаҳру ноҳияҳои вилоят гузориши директори Марказҳои технологияи иттилоотӣ ва коммуникатсияи назди Раёсати маорифи вилоят Шаҳбоз Бобоназаров шунида шуд.
Инчунин дар назди ҳозирин директори Маркази таҳсилоти иловагии вилоят Фирдавс Ашӯрматов оид ба натиҷаҳои иштироки хонандагони муассисаҳои таълимии вилоят дар даври ҷумҳуриявии озмуни “Фурӯғи субҳи доноӣ китоб аст”, пешниҳоди прокуратураи вилояти Суғд аз 12.01.2021, № 8/4-21 оид ба бартараф намудани қонунвайронкуниҳо ва сабабу шароитҳои ба онҳо мусоидаткунанда вобаста ба иҷрои Қонуни Ҷумҳурии Тоҷикистон «Дар бораи пешгирии зӯроварӣ дар оила”, пешниҳоди Прокуратураи вилояти Суғд аз 15.01.2021, №11/4П-21 “Оид ба бартараф намудани қонунвайронкуниҳо ва сабабу шароитҳои ба онҳо мусоидаткунанда”, пешниҳодҳои Раёсати Вазорати корҳои дохилии Ҷумҳурии Тоҷикистон дар вилояти Суғд аз 23 декабри соли 2020, №16/1-3676, аз 25 январи соли 2021, №16/1-314, №16/1-315, №16/1-316 “Дар бораи андешидани тадбирҳои ҳатмии бартарафсозии сабаб ва шароитҳое, ки ба содир намудани ҷиноят аз ҷониби ноболиғон мусоидат мекунад”, баррасии мактуби Прокуратураи генералии Ҷумҳурии Тоҷикистон аз 25.12.2020 сармутахассис ва мутахассисони пешбари Раёсати маорифи вилоят Бахтиёр Сарҳадов, Мирҷумъа Бобозода, Алиҷон Собиров суханронӣ намуданд.
Директори Маркази дарёфт ва рушди истеъдодҳои Раёсати маорифи вилоят Дилбар Исмоилова оид ба рафти иҷроиши қарори Ҳукумати Ҷумҳурии Тоҷикистон аз 3 июни соли 2014, № 353 “Дар бораи Барномаи давлатии дарёфт ва рушди истеъдодҳо барои солҳои 2015-2020” дар шаҳри Панҷакент ва ноҳияи Айнӣ ба ҳозирин маълумот дод.
Оид ба масъалаҳои баррасишуда ва баланд бардоштани сифати таълиму тарбия, пешгирии падидаи номатлуби ҷалби наврасон ба таълимоти ғайрирасмии динӣ, иҷроиши саривақтии дастуру супоришҳои ироагардида ва таъмини ҷамъбасти муташаккилонаи маъракаи обуна ба матбуоти даврии соли 2021 ва дигар вазифаҳои мубрами соҳа сардори Раёсати маорифи вилоят Осим Каримзода ба масъулин дастуру супоришҳои қатъӣ дод.
Дар идомаи кори ҷаласа ба ҳозирин филмҳои мустанади “Бешарафӣ” ва “Хиёнат”, барномаи “Маърифати ҳуқуқӣ”-и телевизиони вилояти Суғд манзур карда шуд.
Дар хотимаи ҷаласа оид ба масъалаҳои баррасишуда қарорҳои дахлдор муҳокима ва қабул гардиданд.
Ғафурҷон Ҷӯраев, Абдусабур Абдуваҳҳобов, “Маорифи Суғд”
ОМӮЗГОР ВА МУРАББИИ СОЛИ ВИЛОЯТ МУАЙЯН ГАРДИДАНД.
Соли равон дар асоси Низомномаи озмуни “Мураббии соли Тоҷикистон”, ки бо қарори мушовараи Вазорати маориф ва илми Ҷумҳурии Тоҷикистон аз 20.01.2015, №29/2 тасдиқ шудааст ва Низомномаи озмуни “Омӯзгори соли Тоҷикистон”, ки бо қарори мушовараи Вазорати маориф ва илми Ҷумҳурии Тоҷикистон аз 16.05.2015, №13/1 тасдиқ шудааст, даври аввали озмунҳои мазкур дар шаҳру ноҳияҳо ва даври вилоятиашон рӯзҳои 1 ва 2 декабр доир гардид.
Дар марҳилаи аввали озмуни вилоятии “Мураббии соли Тоҷикистон” 11 нафар ғолибони даври шаҳриву ноҳиявии озмун аз рӯи 5 шарт — машғулияти таълимӣ, мизи мудаввар, тасвир намудан ва сохтани манзара, дониш ва маҳорати касбии мураббия, ҳолатҳои равонӣ — педагогӣ ширкат варзида, 3 нафарашон: Ахмедова Ирода — мураббии муассисаи таҳсилоти томактабии №4-и шаҳри Конибодом, Ҳоҷибоева Таҳмина — мураббии муассисаи таҳсилоти томактабии №8 -и ноҳияи Бобоҷон Ғафуров ва Сафарова Манфиат — мураббии муассисаи таҳсилоти томактабии 7-и ноҳияи Мастчоҳ ба даври ҷамъбастии озмун роҳхат гирифтанд.
Дар даври ҷамъбастӣ довталабон аз рӯйи шарти муаррифии таҷрибаи корӣ дар доираи 20 дақиқа донишу маҳорати худро намоиш доданд.
Боиси қайд аст, ки ҳамаи иштирокчиён аз уҳдаи иҷрои шартҳо ба хубӣ баромаданд ва аз воситаҳои аёнӣ, диск ва таҷҳизоти дастисохт моҳирона истифода бурданд.
Дар ҷамъбаст мураббии муассисаи таҳсилоти томактабии №8 -и ноҳияи Бобоҷон Ғафуров -Ҳоҷибоева Таҳмина сазовори ҷойи якум гардид ва ба даври ҷумҳуриявии озмун роҳхат гирифт.
Дар марҳилаи аввали озмуни вилоятии “Омӯзгори соли Тоҷикистон” 15 нафар довталабон — ғолибони даври шаҳриву ноҳиявии озмун аз рӯи 6 шарт — дарси конкурсӣ, таҳлили дарс, соати тарбиявӣ, маҷлиси падару модарон, кор бо компутер ва саволу ҷавоб оид ба санадҳои меъёрии ҳуқуқии соҳаи маориф ширкат варзида, 3 нафари онҳо: Толибова Заррина Дадобековна — омӯзгори фанни физикаи муассисаи таълимии давлатии махсусгардонидашудаи №15-и шаҳри Хуҷанд, Ҷалолова Дилором Олимҷоновна — омӯзгори фанни биологияи МТДМ хонандагони болаёқати ноҳияи Бобоҷон Ғафуров ва Турсунов Аҳлиддин — омӯзгори фанни таърих ва ҳуқуқи МТМУ №12-и ноҳияи Зафаробод ба даври ҷамъбастии озмун роҳхат гирифта, дар даври ҷамъбастӣ аз рӯи шарти муаррифии таҷрибаи корӣ баромад намуданд.
Дар ҷамъбаст Ҷалолова Дилором Олимҷоновна — омӯзгори фанни биологияи МТДМ хонандагони болаёқати ноҳияи Бобоҷон Ғафуров сазовори ҷойи якум гардид ва ба даври ҷумҳуриявии озмун роҳхат гирифт.
Мардон Қурбонов, мухбири махсуси нашрияи “Маорифи Суғд”
МАКТАБ МУҚАДДАС АСТ
Бо иштироки сардорони раёсат, мудирони шуъбаҳо, кормандони масъул ва сохторҳои зертобеи Раёсати маорифи вилоят дар Гимназияи рақами 1 шаҳри Хуҷанд мулоқоти озоду шаффофи Вазири маориф ва илми Ҷумҳурии Тоҷикистон Муҳаммадюсуф Имомзода баргузор гардид.
Мулоқотро сардори Раёсати маорифи вилоят Осим Каримзода ифтитоҳ бахшида, ҳозиринро бо мақсад ва ҳадафҳои чорабинии мазкур ошно намуд.
Комилшо Исозода, директори Маркази таҳия, нашр ва муомилоти китобҳои дарсӣ, илмию – методии Вазорати маориф ва илми Ҷумҳурии Тоҷикистон зимни таҳлили ҷараёни тақсимоти китобҳои иҷоравӣ ба муассисаҳои таълимӣ оид ба вазифаҳое сухан ронд, ки ба сари вақт пардохт шудани маблағҳои ба иҷораи китобҳо аз ҷониби шаҳру ноҳияҳои вилоят марбутӣ дошт.
Сипас Вазири маориф ва илми Ҷумҳурии Тоҷикистон дар баробари зикри дастовардҳо оид ба рисолат ва вазифаҳои минбаъдаи аҳли маориф дар самти баланд баланд бардоштани сифати таълиму тарбия, таъмини иҷрои нишондодҳои Барномаҳои давлатӣ, мутобиқ намудани муассисаҳои таълимӣ ба талаботи давр, баланд бардоштани сатҳи касбияти омӯзгорӣ, бунёди ҳарчи бештари биноҳои муассисаҳои таълимӣ ва фарогирии кӯдакону наврасон ба онҳо, ба зинаи сеюми таҳсил ҷалб намудани толибилмон, баланд бардоштани мақом ва манзалати омӯзгор, афзун гардонидани дастовардҳо дар самти иштироки хонандагон дар олимпиадаҳои фаннии ҷумҳуриявию байналмилалӣ, коҳиш додани сатҳи ҷинояткорӣ ва худкушӣ байни ноболиғон андешаҳои ҷолиб баён дошт. Мавсуф инчунин дар назди ҳозирин оид ба ҳаллу фасли саривақтии масъалаҳои соҳа дастуру ҳидоятҳо дод.
Мудири шуъбаи маорифи ноҳияи Айнӣ Абдушукур Хокироҳзода аз номи аҳли нишаст барои дастгириву роҳнамоӣ ва таваҷҷуҳи ҳамешагии ба Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва масъулини соҳа самимона изҳори сипос намуд.
ДАВРИ ВИЛОЯТИИ ОЗМУНИ “ФУРӮҒИ СУБҲИ ДОНОӢ КИТОБ АСТ” ОҒОЗ ЁФТ
Дар муассисаи давлатии Мактаби Президентӣ барои хонандагони болаёқат дар шаҳри Бӯстон даври вилоятии озмуни ҷумҳуриявии “Фурӯғи субҳи доноӣ китоб аст” оғоз гардид.
Дар расми ифтитоҳи чорабинии мазкур муовини Раиси вилоят Зайнура Азимӣ номаи шодбошии Раиси вилоят муҳтарам Раҷаббой Аҳмадзодаро ба самъи ҳайати ҳакамон ва иштирокчиён расонида, таъкид дошт, ки иқдоми маърифатпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шавқ ва завқи сокинони кишварро дубора ба китобу китобхонӣ бештар намуд. Ба ин васила ҳисси хештаншиносӣ, ватандӯстӣ, эҳтиром ба таърих ва меъроси гаронмояи ниёгон, ифтихор аз комёбиҳои даврони соҳибистиқлолии сокинон бештар мешавад.
Муовини аввали Вазири маориф ва илми Ҷумҳурии Тоҷикистон Саломиён Муҳаммаддовуд Қаюм дар баромадаш зикр дошт, ки озмуни мазкур миёни сокинони кишвар ҳамовозии гарму ҷӯшон пайдо намуда, дар қиёс ба соли пешин шумораи иштирокчиён ба маротиб зиёд гардидааст. Ин аз он гувоҳӣ медиҳад, ки миллати мо барандаи фарҳанги бою қадима аст ва ба гузаштаи худ арҷ мегузорад.
Сардори Раёсати маорифи вилоят Осим Каримзода ҳозиринро бо ҳайати ҳакамон, ки иборат аз олимону суханварон, шоирону нависандагони номии кишвар мебошанд, ошно намуда, зикр дошт, ки ба даври сеюми озмуни “Фурӯғи субҳи доноӣ китоб аст” 388 нафар – ғолибони даври шаҳрию ноҳиявӣ роҳхат гирифта, аз рӯи номинатсияҳои аз ёд кардану хондани осори адибони классику муосир ва адабиёти ҷаҳон, қироати ашъори бачагона ва афсонаву ривоятҳои халқӣ байни ҳам қувваозмоӣ менамоянд.
Ёдовар мешавем, ки озмуни мазкур се рӯз давом хоҳад кард. Ғолибон санаи 25 сенябр муайян мегарданд.
РУШДИ ҲАМАҶОНИБАИ ШАХСИЯТ ВА БА КАМОЛ РАСОНИДАНИ ШАҲРВАНДИ БОШУУР РИСОЛАТИ МОСТ
Дар таърихи 27 июли соли 2020 дар партави Амри Президенти Ҷумҳурии Тоҷикистон аз 15 сентябри соли 2011, таҳти №АП – 1729 нишасти матбуотии сардори Раёсати маорифи вилояти Суғд бо намояндагони воситаҳои ахбори омма баргузор гардид.
Дар нишасти матбуотӣ оид ба натиҷаҳои фаъолияти маорифчиёни вилоят дар нимсолаи аввали соли 2020 ва тараддудҳои имрӯзаи ҷомеаҳои меҳнатии муассисаҳои таълимӣ ҷиҳати баланд бардоштани сатҳу сифати таълиму тарбияи насли ояндасоз сухан рафт.
Дар нишасти матбуотӣ наздик ба 30 нафар намояндагони расонаҳои хабарӣ ҳузур доштанд.
Мудирони шуъбаҳо, роҳбарони воҳидҳои сохторӣ, масъулини пешбурди кори таълиму тарбия низ иштирокчиёни нишаст буданд.
Вобаста ба он ки ба хабарнигорон оиди фаъолияти маорифчиёни вилоят таи шаш моҳи соли ҷорӣ гузориши хаттии муфассал ( пресс- релиз) пешниҳод шуда буд, байни сардори Раёсати маорифи вилояти Суғд О. Қ. Каримзода ва хабарнигорон бе ироаи маърӯза оид ба натиҷаҳои фаъолиияти маорифчиён дар шаш моҳи соли 2020 якбора пурсишу посух сурат гирифт.
Дар рафти нишасти матбуотӣ хабарнигорони рӯзномаҳои “Омӯзгор” Н. Раҷабзода, “Ҳақиқати Суғд” Ш. Салимова, “Корвони умед” С. Махкамов, “Эътиқод” Л. Камолиддинов, ШТР “Азия” М. Атаева, “СМ -1” М. Шукурова, “Танин” Ӯ.Раҷабова, радиоҳои “Суғд”З. Аджихалилова, “Замон” А.Ҷӯраев, “Озодӣ” М. Мамадраҷаб ва дигарон вобаста ба масъалаҳои мубрами соҳа, аз ҷумла рванди омодагӣ ба соли нави таҳсил, тадбирҳои андешидашуда ҷиҳати пешгирӣ аз паҳншавии бемориии сироятии COVID -19, пардохти маош ва кӯмакпулиҳо ба омӯзгорон дар ин давра, теъдоди медалҳои хатмкунандагони муассисаҳои таълимӣ, таъминоти хонандагон бо либоси ягонаи мактабӣ, омодагӣ ба давраи тирамоҳ ва зимистонгузаронӣ, содиршавӣ ва пешгирии ҷиноят дар байни мактабиён, раванди иҷрои нақшаи чорабиниҳо ба истиқболи ҷашни мубораки 30 – солагии Истиқлолияти давлатии Ҷумҳурии Тоҷикистон дар муассисаҳои таълимии вилоят бо саволҳо муроҷиат карданд.
Аз ҷониби сардори Раёсати маорифи вилоят Каримзода О.Қ. ба суолҳои матраҳшуда хеле возеҳ равшанӣ андохта шуда, бо мисолҳои мушаххас корҳои дар ин самт анҷомёфта шарҳу эзоҳ ёфтанд. Мавсуф зимни суханрониаш зикр намуд, ки 21 нафар хатмкунандагони муассисаҳои таълимии вилоят барои дарёфти медалҳои тилло ва нуқра ҳуҷҷат пешниҳод намуданд. Аз ин теъдод 15 нафар ба дарёфти медалҳои тилло ва нуқра сазовор гардиданд. Тибқи қарори Ситоди ҷумҳуриявии пешгирии бемории сироятии COVID -19 оғози таҳсил дар муассисаҳои таҳсилоти миёнаи умумӣ рӯзи 17 август назардошт шудааст. Дар иртибот ба паҳншавии бемории сироятии коронавирус маорифчиёни вилоят дар давраи таътил бетарафӣ зоҳир накарда, чанд иқдоми шоистаро пеш гирифтанд. Аз ҷумла, аз ҷониби кормандони Маркази таҳсилоти иловагии вилоят тариқи онлайн фаъолияти 189 маҳфили фосилавии ҳунарҳои мардумӣ, техникӣ ва табиатдӯстонро роҳандозӣ гардида, ба он беш аз 13287 хонандагон ҷалб гардиданд. Ҳамчунин, озмунҳои фосилавии вилоятӣ аз қабили “ Ман дар хона ба кори модарам ёрӣ мерасонам”, “Тозагӣ – гарави саломатӣ”, “Ваҳдат – кафили сулҳ”ташкилу баргузор гардиданд. Дар ин давра аз ҷониби муассисаҳои таҳсилоти иловагӣ 21 ҳазор ниқобҳо дӯхта дар ҳудуди вилоят ройгон тақсим карда шуд.
Инчунин ба дигар саволҳои марбут ба соҳа аз сардори Раёсати маориф хабарнигорон посухҳои мушаххас гирифтанд.
Сардори Раёсати маорифи вилоят Каримзода О.Қ. дар сухани хотимавиаш ба рўзноманигорон ҷиҳати иштироки фаъолонаашон дар нишаст ва барои ҳамкории муфидашон бо маорифчиёни вилоят самимона изҳори сипос кард.
Нишасти матбуотии сардори Раёсати маорифи вилояти Суғд бо намояндагони воситаҳои ахбори умум хеле пурманфиат ҷараён гирифт.
15 медали мактабиёни Суғд
Чанде пеш дар Муассисаи таълимии давлатии Мактаби байналмилалии Президентии шаҳри Душанбе озмуни довталабон барои дарёфти аттестати аълои универсалӣ бо медали тилло ва нуқра, аттестати аълои равиявӣ бо медали тилло ва нуқра дар соли таҳсили 2019 — 2020 баргузор гардид. Дар озмуни мазкур аз муассисаҳои таълимии шаҳрҳои Хуҷанд, Панҷакент, ноҳияҳои Ашт, Ҷаббор Расулов ва Мактаби Президентии шаҳри Бӯстон 21 нафар барои дарёфти медалҳои тилло ва нуқра ҳуҷҷат пешниҳод намуданд. Аз ин теъдод 12 нафар ба дарёфти медали тилло, 3 нафар ба гирифтани медали нуқра мушарраф гардиданд. 6 нафари дигар бо Ифтихорномаи Вазорати маориф ва илми Ҷумҳурии Тоҷикистон сарфароз гардонида шуданд.
| № | Ном ва насаби хонанда |
Шаҳр, ноҳия (муассисаи таълимӣ) |
Аттестати аълои универсалӣ бо медали тилло, аттестати аълои равиявӣ бо медали тилло ва нуқра |
| 1 | Ҳакимов Раҳимҷон | хатмкардаи литсейи №1-и шаҳри Хуҷанд | тилло |
| 2 | Зоҳирова Меҳрангез | хатмкардаи литсейи №1-и шаҳри Хуҷанд | тилло |
| 3 | Холиқова Таҳмина | хатмкардаи гимназияи «Гёте»-и шаҳри Хуҷанд | тилло |
| 4 | Сатторов Султон | хатмкардаи гимназияи №1-и шаҳри Хуҷанд | тилло |
| 5 | Ҷобирова Азиза | хатмкардаи муассисаи таълимии №15-и шаҳри Панҷакент | тилло |
| 6 | Исоқова Гулшодабегим | хатмкардаи гимназияи №1-и ноҳияи Ҷ.Расулов | тилло |
| 7 | Раҳматуллоева Шукрона | Хатмкардаи мактаби Президентии шаҳри Бӯстон | тилло |
| 8 | Сатторова Сарвиноз | хатмкардаи мактаби Президентии шаҳри Бӯстон | тилло |
| 9 | Сайфиддинова Зебо | хатмкардаи мактаби Президентии шаҳри Бӯстон | тилло |
| 10 | Набиев Манучеҳр | хатмкардаи мактаби Президентии шаҳри Бӯстон | тилло |
| 11 | Шарифова Хосиятҷон | хатмкардаи мактаби Президентии шаҳри Бӯстон | тилло |
| 12 | Ҷонбеков Фаромарз | хатмкардаи мактаби Президентии шаҳри Бӯстон | тилло |
| 13 | Абдувоҳидова Мадина | хатмкардаи литсейи донишкадаи политехникии шаҳри Хуҷанд | нуқра |
| 14 | Шерматов Аминҷон | хатмкардаи литсейи донишкадаи политехникии шаҳри Хуҷанд | нуқра |
| 15 | Эргашева Мунзифа | хатмкардаи литсейи донишгоҳи давлатии ҳуқуқ, бизнес ва сиёсати Тоҷикистони шаҳри Хуҷанд | нуқра |
ТАДБИРҲОИ СУДМАНД
Ҷиҳати босамар гузаронидани таътили тобистона Маркази таҳсилоти иловагии вилоят бо дастгирии Раёсати маорифи вилоят чанд иқдоми шоистаро пеш гирифт. Аз ҷумла, дар он айёме, ки пандемияи бемории коронавирус (COVID-19) дар ҷумҳурӣ авҷ гирифт, кормандони Марказ тариқи онлайн фаъолияти 189 маҳфили фосилавии ҳунарҳои мардумӣ, техникӣ ва табиатдӯстонро роҳандозӣ намуда, беш аз 13287 хонандагонро ба онҳо ҷалб намуданд.
Ҳамчунин, ташкилу баргузории озмунҳои фосилавии вилоятӣ аз қабили “ Ман дар хона ба кори модарам ёрӣ мерасонам”, “Тозагӣ – гарави саломатӣ”, “Ваҳдат – кафили сулҳ” дигар аз ибтикороти Марказ маҳсуб мешавад.
Иқдоми пешгирифтаи маорифчиёни вилоят дар мавриди ташкилу баргузории озмуни фосилавии “Тозагӣ — гарави саломатӣ” аз ҷониби Вазорати маориф ва илми Ҷумҳурии Тоҷикистон гарм истиқбол шуд ва ин озмун дар саросари кишвар доман паҳн кард. Ба озмуни мазкур 1032 адад расм – маҳсули мӯқалами наврасон ва 487 иншои беҳтарин пешниҳод гардиданд. Аз ҷониби комиссияи озмунӣ 50 адад маводи беҳтарин ба Вазорати маориф ва илми Ҷумҳурии Тоҷикистон фиристода шуданд.
Ба қарибӣ Раёсати маорифи вилоят фармоишеро ба тасвиб расонд, ки тибқи он ҳамкории Маркази таҳсилоти иловагии вилоят бо кормандони телевизиони вилоят боз ҳам таҳким меёбад. Тибқи ин фармоиш байни мактабиёни вилоят озмуни фосилавии вилоятии “Мо – насли истиқлолем” баргузор мегардад ва беҳтарин видеороликҳо, таманниёт, мақола, лавҳаҳои хонандагон тариқи телевизиони Суғд пахш мегарданд.
Фаъолияти кормандони Раёсати маорифи вилоят, аз ҷумла, Маркази таҳсилоти иловагии вилоят дар таблиғу ташвиқи тадбирҳои пешгирии бемории ҳамагири COVID-19 назаррас аст. Таблиғотчиён дар ҳайати 28 гурӯҳ муттаҳид шуда, ҷиҳати фаҳмонидани омилҳои пешгирикунандаи ин беморӣ ва дигар амрози сироятӣ дар байни аҳолӣ сазоворона саҳм мегиранд. Лозим ба таъкид аст, ки аҳли маорифи вилоят 21 ҳазор адад ниқобҳои тиббӣ таҳия ва ба ниёзмандон ройгон дастрас намуданд.
Мушовараи вазорат тариқи онлайн.
Санаи 18 июли соли 2020, мушовараи вазорат «Оид ба ҷамъбасти фаъолияти Вазорати маориф ва илм дар шашмоҳаи аввали соли 2020» тариқи онлайн баргузор гардид.
