Низомномаи

Шуъбаи вилоятии  Хадамоти давлатии назорат дар соҳаи маориф

  1. Қоидаҳои умумӣ
  2. Шуъбаи вилоятии Хадамоти давлатии назорат дар соҳаи маориф (минбаъд  шуъбаи вилоятии Хадамот) мақомоти давлатӣ буда, назорати  давлатиро дар соҳаи маорифи  вилояти Суғд амалӣ  менамояд.
  3. Шуъбаи вилоятии Хадамот дар нақшаи Раёсати маорифи  вилояти Суғд қарор  дорад.
  4. Шуъбаи вилоятии  Хадамот дар фаъолияти худ Конститутсия (Сарқонун)-и Ҷумҳурии Тоҷикистон, қарору фармонҳои Ҳукумати Ҷумҳурии Тоҷикистон, Вазорати маориф ва илм, мақомоти иҷроияи ҳокимияти давлатии вилояти Суғд, Раёсати маориф  ва  Низомномаи мазкурро ба  роҳбарӣ  мегирад.
  5. Фаъолияти шуъбаи вилоятии  Хадамот аз ҳисоби буҷаи вилоятӣ ва қисман аз ҳисоби кӯмакҳои сармоягузорони дохиливу хориҷӣ, грантҳо, хизматрасониҳои пулакӣ ва дигар намуди манбаъҳое, ки қонунгузории Ҷумҳурии Тоҷикистон манъ намекунад, маблағгузорӣ карда мешавад.
  6. Шуъбаи вилоятии Хадамот татбиқи сиёсати ягонаи давлатӣ дар соҳаи маориф, иҷрои стандартҳои давлатии таҳсилотро дар муассисаҳои таълимӣ (таҳсилоти иловагӣ,  таҳсилоти  миёнаи умумӣ, аз  ҷумла,  гимназия, литсей, мактабҳои ғайридавлатӣ ва хусусӣ), новобаста аз шакли моликият ва тобеияти идоравиашон, дар вилояти  Суғд назорат карда, ба ҷараёни таълиму тарбия, сатҳи сифати дониши хонандагон, тайёр намудани мутахассисон ва дигар намудҳои фаъолияти муассисаҳои таълимӣ баҳо медиҳад.

  1. Ваколатҳои шуъбаи вилоятии Хадамот

 Шуъбаи вилоятии Хадамот ваколатҳои зеринро дорад:

    • рафти иҷрои Қонуни Ҷумҳурии Тоҷикистон «Дар бораи маориф» -ро дар таълимгоҳҳо на­зорат менамояд;
    • сифати таълимро дар муассисаҳои таълимӣ зери назорат мегирад;
    • фаъолияти шӯроҳои таълимӣ–дастурдиҳӣ, педагогӣ ва илмии муассисаҳои таълимиро назорат менамояд;
    • аз мақомоти роҳбарикунандаи муассисаҳои таълимӣ барои назо­рат, тафтиш, ташхис ва аттестатсия маводу ҳуҷҷатҳои заруриро талаб менамояд;
    • дар бораи боздоштан ва қатъ намудани амали фармоишҳо ва
      амрҳое, ки роҳбарони муассисаҳои таълимӣ хилофи қонунҳои амалкунанда, Низомномаҳо ва санадҳои меъёрию ҳуқуқии дигар баровардаанд, ба мақомоти иҷроияи ҳокимияти давлатии вилоят ва Раёсати маориф таклиф пешниҳод менамо­яд;
    • дар ҳолати ошкор намудани қонунвайронкуниҳо, сӯйистеъмол аз мансаб, бемасъулиятӣ аз ҷониби роҳбарияти муассисаҳои таълимӣ оид ба додани ҷазоҳои интизомӣ ва дигар намуди ҷазоҳо нисбати онҳо ба мақомоти иҷроияи ҳокимияти давлатии вилоят ва Раёсати маориф таклиф пешниҳод менамояд.

 а) дар самти иҷозатномадиҳӣ, аттестатсия, аккредитатсияи муассисаҳои таълимӣ:

 бо тартиби муқаррарнамудаи қонунгузории Ҷумҳурии Тоҷикистон аттестатсия, аккредитатсия ва иҷозатномадиҳии ташкилоту муассисаҳои таълимии вилоятро аз рӯи дархости муассисон мегузаронад, мақоми онҳоро муайян менамояд, фаъолияти бахшҳои Хадамоти давлатии назорат дар соҳаи маорифи шаҳру ноҳияҳоро оид ба гузаронидани аттес­татсия, аккредитатсия ва иҷозатномадиҳии муассисаҳои таълимӣ назо­рат мекунад;

  • дар мувофиқа бо сардори Раёсати маорифи вилоят муассисаҳои
    таълимии намуди нав, мақоми вилоятидошта, (ба истиснои муассисаҳои мақоми ҷумҳуридошта ва аз ҷониби шаҳрвандони хориҷӣ таъсис додашуда, муассисаҳои таълимии хусусӣ) нақшаи панҷсола ва солонаи гузаронидани аттестатсияи муассисаҳои таълимиро таҳия, тасдиқ ва амалӣ менамояд;
  • доир ба натиҷаи фаъолияти худ ба ҷаласаҳои мушовараи Раёсати маорифи вилоят маводи иттилоотӣ пешниҳод менамояд;
  • бо тартиби муқарраркардаи қонунгузорӣ заминаи таълимию
    моддӣ, ҳайати кадрӣ, иқтидори илмӣ ва таъминоти таълимию методии муассисаҳои таълимии дар ин ё он минтақа таъсисёбандаро месанҷад ва дар бораи ба меъёрҳои қабулшуда мувофиқат кардани фаъолияти онҳо ба Раёсати маорифи вилояти Суғд таклифҳо пешниҳод мекунад;
  • мутобиқи қарори ҷаласаи мушовараи Раёсати маорифи вилояти Суғд ба муассисаҳои таълимӣ иҷозатнома (литсензия) ва дигар ҳуҷҷатҳои мувофиқ медиҳад.

б) бо мақсади назорати давлатӣ ва баҳодиҳӣ ба сифати таҳсилот:

 бо тартиби муқарраршуда санҷиши сатҳи сифати таҳсилотро дар муассисаҳои таълимӣ, новобаста аз шакли моликият ва тобеияти идоравиашон, амалӣ менамояд;

  • таҳияи маводи таълимӣ – дастурдиҳиро оид ба муайян намудани сифати таҳсилот дар муассисаҳои таълимӣ ба роҳ мемонад;
  • ташкил ва гузаронидани санҷишҳои тестӣ, корҳои хаттӣ, пурсишҳои даҳонӣ ва ғайраро дар муассисаҳои таълимӣ амалӣ менамояд;
  • доир ба муайян кардани сифати таҳсилот дар муассисаҳои таълимӣ санҷишҳо гузаронида, оид ба бартараф намудани камбудиҳо ба Раёсати маорифи вилояти Суғд пешниҳод манзур менамояд.

в) дар соҳаи муқарраргардидаи фаъолият:

  • таҳия ва татбиқи лоиҳа ва барномаҳои ба масъалаҳои сифати таҳсилот мансуббударо иҷро мекунад;
  • ҳимояи маълумоти махфии давлатиро дар доираи салоҳияти худ таъмин менамояд;
  • омӯзиши касбӣ, бозомӯзӣ ва такмили ихтисоси кормандони шӯъбаи вилоятии  Хадамотро ташкил менамояд;
  • дар мувофиқа бо Раёсати маорифи вилояти Суғд оид ба масъалаҳои аттестатсия, аккредитатсия ва иҷозатномадиҳӣ, назорати сифати таҳсилот тибқи тартиби муқарраргардида конференсияҳо, семинарҳо ва маҷлисҳои машваратӣ гузаронида, дар чорабиниҳои ташкилотҳои байнидавлатии таълимӣ, комиссияҳо, кумитаҳо ва форумҳо ширкат меварзад;
  • кормандони фаъоли шуъбаи вилоятии Хадамотро барои ҳавасмандгардонӣ ва гирифтани мукофотҳои давлатӣ ба Раёсати маори­фи вилоят пешниҳод менамояд;
  • ба ариза ва муроҷиатҳои шахсони ҳуқуқӣ ва воқеӣ мансуб ба фаъолияти шуъбаи вилоятии  Хадамот ҷавоб медиҳад;
  • бо тартиби муқарраргардида барои таҳияи маводҳои меъёрӣ–дастурдиҳӣ ва гузаронидани санҷишҳо дар самти фаъолияти шуъбаи вилоятии Хадамот мутахассисонро ҷалб менамояд;
  • далелҳои вайрон кардани қонунгузории Ҷумҳурии Тоҷикистонро вобаста ба соҳаи фаъолияти шуъбаи вилоятии Хадамот ошкор ва пешгирӣ намуда, нисбат ба шахсони ҳуқуқӣ ва воқеӣ ҷиҳати таъмин ва риояи талаботҳои муқарраргардида тадбирҳои огоҳикунанда ва пешгирикунанда меандешад;
  • Шӯрои машваратӣ ва мақомоти ташхисӣ (экспертӣ) — (шӯро, комиссияҳо, гурӯҳҳо) таъсис медиҳад;

Шуъбаи вилоятии Хадамот дар фаъолияти худ ҳуқуқи иҷрои вазифаи     назорати идораи амволи давлатиро надорад (ба истиснои ҳолатҳое, ки санадҳои меъёрию ҳуқуқӣ муқаррар намудаанд).

III. Ташкили фаъолияти шуъбаи вилоятии Хадамот.

 Шуъбаи вилоятии Хадамотро мудир роҳбарӣ мекунад. Мудири шуъба, мутахассисон ва дигар кормандони шуъба аз ҷониби сардори Раёсати маорифи вилоят ба вазифа таъин (тибқи озмун) ва озод  карда  мешаванд.

  1. Мудири шуъбаи вилоятии  Хадамот:

—  барои иҷрои вазифаҳои  ба зиммаи шуъбаи вилоятии Хадамот гузошташуда  ва  дар амал татбиқ намудани сиёсати давлатӣ дар соҳаи маориф масъул мебошад;

—  ба Раёсати маорифи вилояти Суғд оид ба нақшаи кории солона ва дурнамо пешниҳод манзур намуда, доир ба фаъолияти шуъбаи вилоятии  Хадамот ҳисобот  медиҳад;

  1. Шуъбаи вилоятии Хадамот метавонад барои амалӣ намудани фаъолияти худ шӯро таъсис диҳад, ки ба ҳайати он мудир, мутахассисони шуъба, кормандони Раёсати маорифи вилоят, муассисаҳои тобеи он, мудирони бахшҳои шаҳриву ноҳиявии Хадамот, намояндаҳои идораҳои дар тобеияташон муассисаҳои таълимидошта дохил мешаванд ва фаъолияти он тибқи Низомнома ба роҳ монда мешавад.

Маҳалли ҷойгиршавии шуъбаи вилоятии Хадамоти давлатии назорат дар     соҳаи маориф: Ҷумҳурии Тоҷикистон,  вилояти  Суғд, шаҳри Хуҷанд,  кӯчаи Шарқ -29.