Дар арафаи Соли нави мелодии 2016 дар маҷлисгоҳи Раёсати маорифи вилоят бо иштироки муовини Раиси вилоят Назира Ғаффорӣ маросими тақдими тӯҳфаҳо ва нишонҳои сарисинагии Аълочии маориф ва илми Ҷумҳурии Тоҷикистон баргузор гардид.
Ҷамъомадро сардори Раёсати маорифи вилоят Каримзода Осим Қосимӣ ифтитоҳ бахшида, ҳамагонро бо фарорасии соли нав табрик гуфт. Мавсуф зикр намуд, ки соли 2015 барои кулли маорифчиёни вилоят соли барору пешрафтҳо буд. Толибилмони мактабҳои вилоят дар олимпиада ва озмунҳои ҷумҳуриявиву байналмилалӣ ба дастовардҳои назаррас соҳиб гардида, бо ба даст овардани 73 ҷойи ифтихорӣ дар миқёси кишвар мақоми сазоворро ишғол намуданд. Дар паси ҳамаи ин дастовардҳо заҳмати бурдборона ва талошҳои пайгиронаи устодон, омӯзгорони муасисаҳои таҳсилоти миёнаи умумии вилоят ниҳон аст. Бо назардошти ин ҳама меҳнати ҳалолу суботкорона Раиси вилоят, муовини аввали Раиси Маҷлиси миллии Маҷлиси Олии Ҷумҳурии Тоҷикистон муҳтарам Абдураҳмон Қодирӣ ва вазири маориф ва илми Ҷумҳурии Тоҷикистон муҳтарам Нуриддин Саид як зумра диловарони арсаи меҳнат, пешқадамони соҳаи маорифро бо нишони сарисинагии Аълочии маориф ва илми Ҷумҳурии Тоҷикистон, Ифтихорномаи Вазорати маориф, тӯҳфаҳои хотиравии Раиси вилоят, Сипосномаи Раёсати маорифи вилояти Суғд тақдир намуданд.
Муовини Раиси вилоят Назира Ғаффорӣ аз номи Раиси вилоят муҳтарам Абдураҳмон Қодирӣ иштирокчиёни ҷамъомадро барои сазовор шудан ба чунин қадршиносӣ муборакбод гуфта, аз ҷумла зикр намуд, ки мақомоти иҷроияи ҳокимияти давлатии вилоят ба соҳаи маориф диду назари хосса дошта, 200 нафар омӯзгорони беҳтарин соли равон ройгон дар осоишгоҳи «Зумрад» табобату истироҳат намуданд. Ҳамчунин бо иқдоми Раиси вилоят Ҷоизаи Раиси вилоят дар соҳаи маориф таъсис ёфта, дар машварати августии омӯзгорон 6 нафар бо ин ҷоизаи арзанда қадршиносӣ шуданд.
Сипас дар вазъияти тантанавӣ Назира Ғаффорӣ ва Каримзода Осим Қосимӣ ба пешқадамони соҳа унвони Аълочии маориф ва илми Ҷумҳурии Тоҷикистон, Ифтихорномаҳои Вазорат, Сипосномаҳои Раиси вилоят ва туҳфаҳои хотиравӣ тақдим намуданд.
Аз номи мукофотгирифтагон омӯзгори синфҳои ибтидоии муассисаи таҳсилоти миёни умумии рақами 1- шаҳри Қайроққум Ҳоҷалой Комбоева ба Вазорати маориф ва илми Ҷумҳурии Тоҷикистон, мақомоти иҷроияи ҳокимияти давлатии вилоят, Раёсати маорифи вилоят барои қадршиносӣ изҳори сипоси самимӣ намуда, ваъда дод, ки дар соли нав ба комёбиҳои боз ҳам баландтари меҳнатӣ ноил мегарданд.
Абдусабур Абдуваҳҳобов
